’ماچس ہوگی آپ کے پاس؟‘ معروف اداکار نثار قادری انتقال کرگئے

پاکستان کے معروف سینئر اداکار نثار قادری کا انتقال کرگئے۔ اداکار اور پروڈیوسر نبیل ظفر نے سوشل میڈیا پر جاری پیغام میں کہا کہ پاکستان ٹیلی ویژن کے مشہور اداکار نثار قادری 84 سال کی عمر میں انتقال کر گئے۔

سرکاری خبررساں ادارے ’اے پی پی‘ کے مطابق نثار قادری ان گنت ہٹ پی ٹی وی ڈرامہ سیریلز میں اداکری کے جوہر دکھا چکے ہیں۔ وہ منفی کردار ادا کرنے کے لیے مشہور تھے۔ وہ کچھ مزاحیہ شوز میں بھی شریک ہوئے۔نثار قادری نے اپنے کیریئر کا آغاز 1966 میں ریڈیو پاکستان راولپنڈی سے کیا تھا۔ پھر انہوں نے متعدد ٹی وی ڈراموں، فلموں اور ریڈیو ڈراموں میں بھی اداکاری اور صدا کاری کی۔

ٹی وی ڈرامے ’ایک حقیقت ایک افسانہ‘ میں ان کا دلکش جملہ ’ماچس ہوگی آپ کے پاس؟‘ ناظرین میں کافی مقبول ہوا۔ انہیں ٹی وی، ریڈیو اور اسٹیج پر اپنی خدمات کے لیے 2016 میں صدارتی تمغہ برائے حسن کارکردگی سے نوازا گیا تھا۔ 2010 کی دہائی کے وسط میں وہ چہرے کے فالج کا شکار ہوئے اور اس دوران وہ سکرین سے غائب رہے۔ ان کے مشہور ڈراموں میں خواہشیں، پورے چاند کی رات، آدھی دھوپ، نجات، آتش، اضطراب، انگار وادی، بہادر علی، کاروان اور سمندر شامل ہیں۔

نثار قادری نے سوگواران میں 2 بیٹے اور ایک بیٹی چھوڑی ہے۔ ان کی نماز جنازہ اور تدفین چکلالہ راولپنڈی میں کی گئی ہے۔