وفاقی دارالحکومت اسلام آباد میں شدید دھند کے باعث اسلام آباد انٹرنیشنل ایئرپورٹ پر پروازوں کا شیڈول درہم برہم کردیا، 30 پروازیں منسوخ جبکہ 100 تاخیر کا شکار ہوگئی ہیں۔
دھند کے باعث جہاں اسلام آباد ایئرپورٹ سے اندرون ملک اور بیرون ملک روانگی کے لیے پروازیں منسوخ کی گئی ہیں وہی اسلام آباد کے لیے 9 ملکی اور غیر ملکی پروازوں کو لاہور، پشاور، ملتان اور کراچی میں لینڈ کروایا گیا ہے۔
جدہ سے اسلام آباد جانے والی بین الاقوامی پرواز پی کے 842 کو کراچی ایئرپورٹ پر لینڈ کروایا گیا ہے جبکہ دبئی سے اسلام آباد کے لیے پرواز پی کے 234 کو منسوخ کردیا گیا ہے۔
پروازیں منسوخ ہونے سے شہریوں کی پریشانی کو مدنظر رکھتے ہوئے ایئرپورٹ حکام نے کہا ہے کہ دھند کی حالت بہتر ہونے کے بعد پروازوں کا شیڈول بحال کر دیا جائے گا۔
ایئرپورٹ انتظامیہ نے مسافروں کو مشورہ دیا کہ وہ ایئرپورٹ پہنچنے سے پہلے ہیلپ لائن سے پرواز کی آمد، روانگی کی تصدیق کر لیں۔
