پاکستان تحریک انصاف کے بانی چیئرمین عمران خان اور ان کی اہلیہ بشریٰ بی بی کے خلاف مبینہ غیر شرعی نکاح کے مقدمے میں عدالت نے فرد جرم عائد کرنے کے لیے تاریخ مقرر کرنے کا تحریری حکمنامہ جاری کردیا۔
ڈسٹرکٹ اینڈ سیشن عدالت کے جج قدرت اللہ نے تحریری حکمنامے میں کہا کہ مقدمے سے متعلق تمام دستاویزی کاپیاں ملزمان کو فراہم کی جاتی ہیں، فرد جرم 10 جنوری 2024 کو عائد کی جائے گی، ملزمان کے وکلا کی جانب سے عوام اور میڈیا نمائندگان کی وافر تعداد کو عدالت تک رسائی کی استدعا کی گئی، عدالت میں عوام اور میڈیا نمائندگان کی موجودگی کے حوالے سے عدالت 22 دسمبر کو حکمنامہ جاری کرچکی ہے۔
Related Posts
عدالت نے اپنے حکمنامے میں کہا کہ سپریٹینڈنٹ اڈیالہ جیل عدالت کے 22 دسمبر کے احکامات پر عملدرآمد یقینی بنائیں، عدالت میں عوام کی تعداد اور سیکیورٹی امور سپریٹینڈنٹ اڈیالہ جیل کا دائرہ اختیار ہے، سپریٹینڈنٹ اڈیالہ جیل عدالت میں جگہ کی دستیابی کو مدنظر رکھتے ہوئے عوام اور میڈیاکی تعداد سے متعلق فیصلہ کریں۔
واضح رہے کہ 22 دسمبر کو اسلام آباد کی ڈسٹرکٹ اینڈ سیشن عدالت نے غیر شرعی نکاح کیس میں عمران خان کی اہلیہ کی عدالت میں عدم پیشی پر اظہار برہمی کیا تھا۔ اس سے قبل 18 دسمبر کو ہونے والی سماعت پر عدالت نے کیس کا اوپن ٹرائل جیل سمیت کسی بھی محفوظ مقام پر کرنے کا حکم جاری کیا تھا۔
