کنگ آف بالی وڈ شاہ رخ خان کی بیوی گوری خان نے انکشاف کیا ہے کہ ان کے بڑے بھائی وکرانت چبر ابتدائی طور پر نہ صرف شاہ رخ خان کو قبول کرنے میں ہچکچاہٹ کا اظہار کرتے تھے بلکہ ان پر شاہ رخ خان کے قتل کا جنون بھی سوار تھا۔
فلم فیئر کو دیے گئے ایک انٹرویو میں گوری نے بتایا تھا کہ شادی کے بعد ابتدائی طور پر شاہ رخ خان کو قبول کرنے کے حوالے سے ان کی فیملی کو بہت سے خدشات تھے۔ گوری خان نے انکشاف کیا کہ ’ان کا خاندان ہندو مذہب سے تھا جو یہ نہیں چاہتا تھا کہ وہ کسی مسلمان سے شادی کریں۔ شاہ رخ کے حوالے سے ان کے تعلقات کو لے کر غیر سنجیدہ ہونے تک کی رائے قائم کی جا چکی تھی۔‘
اپنے بھائی وکرانت چبر کے بارے میں بات کرتے ہوئے گوری خان نے بتایا کہ ’ان کے بڑے بھائی جب بھی شاہ رخ خان کو میری طرف دیکھتے ہوئے دیکھ لیتے تو ان کے سر پر خون سوار ہو جاتا تھا یہاں تک کہ ایک بار انہوں نے شاہ رخ خان کو جان سے مارنے کی دھمکی بھی دے دی تھی۔‘
انہوں نے بتایا کہ’ان کے بھائی ویسے تو مزاج کے بہت ٹھنڈے تھے مگر شاہ رخ خان کو دیکھتے ہی پتا نہیں انہیں کیا ہو جاتا تھا کہ وہ غصے سے لال پیلے ہو جاتے تھے۔‘
گوری خان نے بتایا کہ ’ان کے بھائی وکرانت انہیں لے کر کافی فکر مند رہا کرتے تھے جب بھی شاہ رخ خان کو انہیں گھورتے ہوئے دیکھتے تو غصے میں چلانے لگتے کہ میں تمہارا کچومر بنا دوں گا، جان سے مار دوں گا۔‘
مزید پڑھیں
گوری نے مزید کہا کہ ’میں جانتی ہوں یہ دھمکیاں شاہ رخ کے لیے کافی پریشان کن رہی ہوں گی مگر کیونکہ وہ میرے بڑے بھائی تھے اس لیے شاہ رخ خان سب برداشت کرتے گئے۔‘
انہوں نے انکشاف کیا کہ جب ان کی شاہ رخ سے ملاقات ہوئی تو شاہ رخ خان 12ویں جبکہ وہ خود 9ویں جماعت میں پڑھتی تھیں، حیرت انگیز بات یہ ہے کہ اس وقت ان کے بڑے بھائی وکرانت بھی کسی لڑکی کو ڈیٹ کیا کرتے تھے، اس کے باوجود وہ شاہ رخ کو پسند کرنے کی ہمت تک نہیں رکھتی تھیں، لیکن ہمارے شادی کا تمام کریڈٹ شاہ رخ خان کی بے لوث محبت کو جاتا ہے۔
واضح رہے کہ گوری خان اور شاہ رخ خان کی شادی 25 اکتوبر 1991 میں ہوئی تھی جب گوری 22 سال جبکہ شاہ رخ خان 26 برس کے تھے۔ شاہ رخ خان اور گوری خان نے بین المذاہب شادی کی تھی، لیکن انہوں نے دونوں مذاہب کا احترام یقینی بنایا اور اپنے بچوں کی پرورش سیکولر طریقے سے کی ہے۔ ان کے 3 بچے آریان خان، سہانا خان اور ابرام خان ہیں۔
