ایک اسرائیلی سنائپر نے ایک فلسطینی خاتون کو گولی مار کر ہلاک کر دیا حالانکہ اس کے پوتے نے سفید جھنڈا پکڑا ہوا تھا جب وہ غزہ شہر سے جنگ زدہ علاقے کے جنوب میں ایک ‘محفوظ علاقے’ میں پہنچنے کی کوشش کررہے تھے۔
گزشتہ روز خبر رساں ادارے مڈل ایسٹ آئی نے ایک لرزہ خیز ویڈیو شیئر کی ہے جس میں دکھایا گیا ہے کہ ایک فلسطینی خاتون جس کا نام ہالا راشد عبدالعطی ہے، کو اسرائیلی اسنائپر نے غزہ شہر سے نکلتے ہوئے گولی مار کر شہید کیا جب وہ دیگر متعدد فلسطینیوں کے ہمراہ اپنے نواسے کے ساتھ محفوظ علاقے کی طرف جارہی تھی، قافلے میں سب سے آگے چلتے ہوئے خاتون نے اپنے نواسے کا ہاتھ پکڑا ہوا تھا، جب کہ نواسے کے ہاتھ میں سفید جھنڈا تھا، اس کے باوجود اسرائیلی اسنائپر نے غزہ کی دادی کو گولی مار دی۔
ویڈیو میں دیکھا جاسکتا ہے کہ خاتون اپنے نواسے کا ہاتھ پکڑے جارہی ہے کہ اسرائیلی اسنائپر اسے گولی مار دیتا ہے، گولی لگتے ہی خاتون نیچے گر پڑتی ہے جبکہ اس کا نواسا خوفزدہ ہوکر واپس بھاگتا ہے۔ جس کے بعد ان کے ساتھ چلنے والے لوگوں میں سے ایک شخص آگے آکر اس کی خیریت دریافت کرتا ہے۔
عبدالعطی کے زندہ بچ جانے والے خاندان کے افراد( جو اب جنگ زدہ غزہ کی پٹی میں بکھرے ہوئے ہیں) کے مطابق انہوں نے اس راستے سے غزہ شہر سے باہر نکلنے کا فیصلہ ریڈ کراس کے ساتھ مشاورت سے کیا تھا۔
Exclusive footage obtained by Middle East Eye shows a Palestinian woman being shot by Israeli forces in the streets of Gaza City’s centre on 12 November, as she and others attempted to evacuate the area while holding white flags amid the intense Israeli assault on northern Gaza. pic.twitter.com/E92NI6v8Q4
— Middle East Eye (@MiddleEastEye) January 8, 2024
جنوبی اسرائیل پر 7 اکتوبر کو ہونے والے حملے کے بعد، ریڈ کراس نے کئی دیگر علاقائی ممالک اور امریکا کے ساتھ مل کر ‘محفوظ زون’ بنانے کے لیے کام کرنا شروع کیا تھا جس سے فلسطینیوں کو شمالی غزہ سے انکلیو کے جنوبی حصے میں منتقل ہونے کا موقع ملا۔
’مڈل ایسٹ آئی‘ کے مطابق اسرائیلی فوج اور اس کی حکومت کی طرف سے جنوبی غزہ تک پہنچنے کے لیے نام نہاد ‘محفوظ زون’ بنایا۔
عبدالعطی کی بیٹیوں میں سے ایک سارہ باسم خریس کے مطابق ان کے خاندان کے گھر چھوڑنے سے ایک دن قبل اسرائیلی فورسز نے گنجان آباد رہائشی علاقے کا ٹینکوں اور سنائپرز سے محاصرہ کر لیا تھا۔
‘ہم چیخوں اور لوگوں کے رونے کی آوازوں سے بیدار ہوئے، 2 گھنٹے ٹینکوں میں گھرے رہنے کے بعد ہم نے ریڈ کراس کو فون کیا تاکہ ہمیں وہاں سے نکالنے کی کوشش میں مدد ملے۔‘
ریڈ کراس نے انہیں بتایا کہ تنظیم نے غزہ کے شمال میں کام کرنا چھوڑ دیا ہے اور جس علاقے میں ہم ہیں وہ ریڈ زون کا میدان جنگ بن گیا ہے اور ہمیں فوری طور پر علاقہ چھوڑنا پڑا، ریڈ کراس نے مشورہ دیا کہ صورتحال تیزی سے خطرناک ہوتی جا رہی ہے اور ہمیں وہاں سے جانے کی ضرورت ہے۔
’میں نے اسے زمین پر گرتے دیکھا‘
خریس کے مطابق ان کی والدہ کے قتل کی صبح پورا خاندان بیدار ہوا، سب نے ایک ساتھ نماز ادا کی کیونکہ ان کے پڑوس میں اسرائیلی بموں کی آواز تیز ہو گئی تھی، عبد العطی نے پھر سب گھر والوں کو ناشتہ کرایا اور گھر سے نکلنے سے قبل سب نے گھر میں قرآن پاک کی تلاوت بھی کی۔
‘صبح 11 بجے کے قریب سنائپرز اور بموں کی آواز آئی اور ہمارے پڑوسی ‘چھوڑو، چھوڑ دو’ کے نعرے لگا رہے تھے، اس لیے ہم نے اپنی چیزیں اٹھائیں، سفید جھنڈے پکڑے اور گھر سے نکل گئے، جنگی طیارے ہمارے سروں کے اوپر چکر لگا رہے تھے اور اوپر سے گولہ بارود پھینک رہے تھے۔‘
خریس کے مطابق اس کے بعد وہ اپنے گھر سے عمر بن عبدالعزیز اسٹریٹ کی سمت سے الشہید عبدالقادر الحسین اسٹریٹ کی طرف روانہ ہوئے، ان کے ساتھ کم از کم 100 دوسرے لوگ شامل ہوئے، جن میں زیادہ تر خواتین اور بچے تھے، جیسے ہی وہ سڑک کے بیچ میں نکلے تو گولی چلنے کی آواز آئی اور اس نے اپنی ماں کو سڑک پر گرتے دیکھا۔ انہوں نے کہا، ‘میری ماں نے اپنے نواسے (میری بہن کے بیٹے) کو پکڑ رکھا تھا جو مارے جانے کے وقت فرش پر گر گیا۔’
انہوں نے مزید بتایا ‘میں اپنی ماں کے لیے چیخ رہی تھی، ایسا محسوس ہوتا تھا کہ ہم ہر منٹ میں ہزار بار موت کا مزہ چکھ رہے ہیں۔’
خریس کی بہن حبہ(جو کہ 2بچوں کی 28 سالہ ماں ہے) کے مطابق ان کے خاندان کو دوسرے مقامی باشندوں نے بار بار بتایا کہ وہ ایک ساتھ چلے جائیں گے کیونکہ یہ زیادہ محفوظ ہوگا، ہمیں جو ریڈ کراس نے ہدایات کی تھی کہ غزہ کے جنوب میں ایک محفوظ راہداری ہوگی، میری والدہ میرے بیٹے تیم کو لے کر جا رہی تھیں۔’
‘حبہ نے بتایا کہ ’میں گھر سے باہر نکل کر اپنے شوہر کا انتظار کر رہی تھی جب میں نے فائر کی آواز سنی اور اپنی بہن اور کزن کی چیخیں سنائی دیں۔ وہ چلاتے رہے ‘واپس جاؤ اور واپس جاؤ’، پھر میں نے اپنی ماں کی بے جان لاش دیکھی، میرا بھائی محمد، جو 22 سال کا ہے، اپنی جان خطرے میں ڈال کر جا کر میری ماں کی لاش کو گلی سے اٹھا کر گھر واپس لے آیا۔’
حبہ کے مطابق جب ان کی والدہ کو قتل کیا گیا تو وہ اپنے ساتھ روٹی اور زیتون کے تیل کے تھیلے لے کر جا رہی تھی کیونکہ انھیں کچھ اندازہ نہیں تھا کہ وہ کب تک گھر سے دور رہیں گے اور کیا انہیں کھانا اور دیگر بنیادی چیزیں میسر رہیں گی؟
اس نے بتایا کہ اس قتل نے اسے اور اس کے شوہر یوسف کو ان کے بیٹے تیم سے الگ کر دیا ہے، جس سے ان کے مصائب میں مزید ناقابل برداشت درد اور اذیت کا اضافہ ہوا ہے۔
اسرائیلی انسائپر کی گولی سے جاں بحق ہونے والی خاتون کے داماد یوسف نے بتایا ‘میں اپنے گھر میں سامان اکٹھا کر رہا تھا اور باہر جانے کے لیے تیار ہو رہا تھا جب میں نے باہر سے چیخیں سنیں، مجھے نہیں لگتا تھا کہ یہ ہمارا خاندان ہے، میں تیم کو ڈھونڈنے نکلا تو ایک ٹینک ہمارے بالکل قریب دیکھا۔ جب میں گھر واپس گیا تو میری ساس مر چکی تھی اور تیم غائب تھا۔’
خاتون کے قتل کے بعد تیم کو ایک پڑوسی نصیرات اور پھر جنوبی غزہ میں رفح لے گیا جہاں وہ اپنی خالہ کے ساتھ ہے، یہ واضح نہیں ہے کہ اس بچے کو اس کے والدین اسے دوبارہ کب مل سکیں گے۔
18 سالہ ملک انور الخطیب (جو مرنے والی خاتون کا بھانجا ہے) نے بھی بتایا کہ ’گولی لگنے کے بعد ہم خالہ کو گھر کے اندر لے گئے اور ہم نے اسے دودھ پلانے کی کوشش کی لیکن وہ پہلے ہی مر چکی تھی، ہم نے اس کی لاش پر دعا کی اور اسے گھر کے قریب دفن کیا، اس کے بعد، ہمیں بتایا گیا کہ ریڈ کراس ہمیں دوبارہ وہاں سے نکلنے میں مدد کرے گا لیکن ہمیں اب ریڈکراس پر اعتماد نہیں رہا تھا اور ہم اپنے خاندان کو مزید خطرے میں ڈالنے کے لیے تیار نہیں تھے۔’
اسرائیلی فوج نے اس قتل سے متعلق سوالات کا کوئی جواب نہیں دیا ہے، لیکن فوج کی طرف سے واقعے کے اسی دن شائع کی گئی تصویر میں عبدالعطی کے گھر کے متوازی سڑک النصر اسٹریٹ پر تعینات فوج کے ٹینک اور سنائپرز دکھائی دے رہے ہیں۔
تصویر میں فوج کو چوراہے کے اس علاقے میں موجود دکھایا گیا ہے جہاں سے گولی چلائی گئی تھی۔
واقعے سے متعلق ریڈ کراس نے بھی کوئی جواب دیا ہے نہ اسرائیلی فوج نے کوئی وضاحت پیش کی ہے۔
مقتول کے اہل خانہ کا کہنا ہے کہ اللہ کا شکر ہے انہوں نے عبد العطی کو ان کے گھر کے قریب دفن کیا، کیونکہ کئی سڑتی ہوئی لاشیں سڑکوں پر پڑی رہتی ہیں، جنہیں اکثر اسرائیلی ٹینکوں اور فوجی گاڑیاں روند دیتی ہیں یا آوارہ کتے کھا جاتے ہیں۔
