چیف آف آرمی اسٹاف جنرل سیّد عاصم منیر نے کہا ہے کہ خود انحصاری اور جدید ٹیکنالوجی کے فروغ کے لیے اقدامات کرتے رہیں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے پاکستان آرڈیننس فیکٹریز واہ کا دورہ کیا ہے۔
مزید پڑھیں
آئی ایس پی آر کے مطابق آرمی چیف کو پی او ایف کی پیداواری صلاحیتوں، پاکستان کی مسلح افواج کی دفاعی ضروریات کو پورا کرنے میں اس کے تعاون اور برآمدی صلاحیت کے بارے میں بریفنگ دی گئی۔
آرمی چیف عاصم منیر نے پی او ایف مصنوعات کی وسیع رینج کا مشاہدہ کیا جس میں ٹیسٹ اور ٹرائلز کے تحت مقامی طور پر ڈیزائن اور تیار کردہ نئے ہتھیار اور بارود شامل تھے۔
آرمی چیف نے پاکستان آرڈیننس فیکٹریز کو اہم دفاعی صنعت بناکر ملک کی سلامتی اور معیشت میں بہترین کردار پر پی ایف افسران اور عملے کے کردار کو سراہا۔
انہوں نے کہاکہ مقامی صنعتوں کے فروغ اور خودانحصاری سے قومی ترقی کا راستہ متعین ہوتا ہے۔ ہم خود انحصاری اور جدید ترین ٹیکنالوجی کے لیے کام جاری رکھیں گے۔
قبل ازیں چیئرمین پی او ایف واہ نے آرمی چیف جنرل عاصم منیر کا آمد پر استقبال کیا۔
