اداکارہ صبا فیصل کو سرکاری چینل سے معطل کیوں کیا گیا تھا؟

پاکستانی اداکارہ صبا فیصل ٹی وی ڈراموں سے جانی جاتی ہیں۔ چاہے ’ماں‘ کا کردار ہو، یا ’ساس‘ کا، انہوں نے بخوبی ہر کردار نبھایا جس کی وجہ سے ان کے مداحوں کی تعداد بڑھتی گئی۔ کچھ عرصہ قبل، ان کے بیٹے ارسلان کی شادی ہوئی جس پر ساری پاکستانی فلم انڈسٹری نے شرکت کی، اور اس تقریب کی تصویریں سوشل میڈیا پر بھی وائرل ہوئیں۔

صبا فیصل پبلک میں آنے سے کبھی نہیں گھبرائیں، نا ہی انہوں نے اپنی ذاتی زندگی پر روشنی ڈالنے سے کبھی انکار کیا۔ اس میں ان کی ٹیلی ویژن پروگرام یا ٹاک شوز میں آنا بھی شامل ہیں۔ صبا نے کیریئر کا آغاز خبریں پڑھنے سے کیا تھا۔ صبا نے سرکاری ادارے پی ٹی وی سے کیرئیر کا آغاز کیا۔

ان کی پہلی نوکری نیوز کاسٹر کے طور پہ تھی، جو انہوں نے بڑے دل سے کی۔ پی ٹی وی میں کافی عرصہ کام کرنے کی وجہ سے، ان کو ’سینئیر‘ نیوز کاسٹر سمجھا جاتا تھا۔ صبا نے انٹرویو میں بتایا کہ کیونکہ ان کا تجربہ زیادہ تھا تو اکثر خبریں وہی پڑھتی تھیں۔ لیکن انہوں نے ایک بات ایسی بات بتائی جو پہلے کسی کو پتا نہیں تھی۔

صبا کو لائیو ٹرانسمیشن کے دوران، خبر میں غلطی کرنے کی وجہ سے پی ٹی وی نے 15 دن کے لیے معطل کردیا تھا۔ کہانی کچھ یوں ہے کہ انڈیا کے وزیراعظم اندر کمار گجرال نے پاکستان کا دورہ کیا تھا۔ ان کے دورہ کے دوران صبا نے خبریں پڑھنی تھی۔ وہ کہتی ہیں کہ ’میں نے پوری خبر پڑھ دی، لیکن اس کے بعد میں نے دیکھا کہ ہر افسر اپنے فون پہ ہے۔ میں نے پوچھا کیا ہوا ہے؟ مجھے ایم سی آر میں بلایا گیا جہاں پر میرے باس نے مجھے میری غلطی بتائی۔‘

غلطی کچھ یوں تھی کہ صبا فیصل نے اندر کمار گجرال کا نام 17 دفعہ خبر نامے میں لینا تھا، لیکن انہوں نے ’انور کمال گجرات‘ 17 دفعہ بول کر سنگین غلطی کی، اس پر انہیں پی ٹی وی نے 15 دن کے لیے معطل کر دیا گیا تھا۔