وفاقی دارالحکومت اسلام آباد میں دھرنا دینے والی بلوچ یکجہتی کمیٹی کی ماہ رنگ بلوچ کا پاکستان مخالف پروپیگنڈا بے نقاب ہو گیا ہے۔
یہ بات عیاں ہے کہ امن دشمن بھارت طویل عرصے سے پاکستان بالخصوص بلوچستان کے نوجوانوں کو گمراہ کر کے اپنے مذموم عزائم کے حصول کے لیے استعمال کر رہا ہے، اسی تناظر میں بلوچستان سے تعلق رکھنے والی خاتون ماہ رنگ بلوچ بلوچوں کے حقوق اور مظلومیت کا لبادہ اوڑھ کر اسلام آباد میں ریاست مخالف دھرنے میں شریک ہے۔
تازہ ترین ویڈیو میں دیکھا اور سنا جاسکتا ہے کہ ماہ رنگ بلوچ اپنے خطاب میں پاکستان کی ایران میں کیے جانے والی اسٹرائیک میں ہلاک دہشتگردوں کے حوالے سے اقرار کرتے ہوئے کہہ رہی ہیں کہ ’آپ سب کو اس بات کا اندازہ ہے کہ ایران میں جو لوگ مارے گئے ہیں ان کے لواحقین یہاں دھرنے میں موجود ہیں۔‘
کیا محترمہ ماہ رنگ بلوچ صاحبہ سچ بول گئی ہیں ؟ پاکستان نے تو ایران میں موجود BLA اور BLF کے دہشتگردوں کو نشانہ بنایا ہے کیا پاکستان کا یہ عمل قابل مذمت ہے یا قابل ستائش ؟ pic.twitter.com/F8SwqjhTPn
— Hassan Ayub Khan (@HassanAyub82) January 18, 2024
ماہ رنگ بلوچ کا یہ بیان اس بات کی واضح عکاسی کرتا ہے کہ پاکستان میں دہشتگردی کرنے والے بی ایل اے اور بی ایل ایف کے دہشتگرد ایران میں روپوش ہیں جہاں سے وہ پاکستان کے خلاف دہشتگردی کی کارروائیاں کرتے ہیں۔
کچھ عرصہ قبل سیکیورٹی فورسز کے ہاتھوں ہلاک کیے جانے والے دہشتگرد بالاچ اور اس جیسے بہت سے دہشتگردوں کی نمائندگی کرنے والی ماہ رنگ بلوچ بالاخر سچ زبان پر لے ہی آئی ہیں۔ ریاست کا روز اول سے یہی موقف ہے کہ یہ دہشت گرد عناصر گھروں سے بھاگ کر بیرون ممالک بالخصوص ایران اور افغانستان میں روپوش ہیں۔
مزید پڑھیں
ایسے میں پاکستان دشمن دہشتگردوں کے لیے ’بلوچ یکجہتی کمیٹی‘ کا احتجاجی مظاہرہ عام فہم سے بالاتر ہے۔ بلوچ یکجہتی کمیٹی کی ماہ رنگ بلوچ بی ایل کے سرغنہ اور ریاستی اداروں پر لاتعداد حملوں میں ملوث عبدالغفار لانگو کی بیٹی ہیں۔
ماہ رنگ بلوچ نے نہ صرف ریاستی وظیفے پر تعلیم حاصل کی بلکہ تعلیم مکمل کرنے کے بعد سے اب تک وہ سرکاری تنخواہ کے ساتھ ساتھ متعدد مراعات سے بھی استفادہ کر رہی ہیں۔ اب وہ ملک دُشمن عناصر کے ایما پر ریاست مخالف پروپیگنڈا کرتے ہوئے بے نقاب ہو گئی ہیں۔
جن لا پتہ افراد کے نام پر ریاست مخالف پروپیگینڈا کیا جا رہا ہے وہ بھاگ کر ایران میں روپوش ہو گئے ہیں اور ایران میں پاکستان مخالف دہشت گرد تنظیموں میں شامل ہو کر پاکستان بالخصوص بلوچستان میں دہشت گردی پھیلانے میں مصروف ہیں۔
ان تمام حالات میں ماہ رنگ بلوچ سمیت دیگر لوگوں کا اسلام آباد میں دھرنا اور احتجاج سمجھ سے بالاتر ہے۔
