’بغیر تیاری آجاتا ہے، میں مطمئن نہیں‘ عمران خان نے وکیل لطیف کھوسہ کو پیروی سے ہٹا دیا

سابق وزیراعظم عمران خان نے اپنی لیگل ٹیم کی کارکردگی سے مطمئن نہ ہونے کے باعث نیب کیسز کی پیروی کرنے والے وکلا کی ٹیم کو تبدیل کردیا ہے۔ ذرائع کے مطابق عمران خان نے رواں ہفتے اپنی لیگل ٹیم سے مشاورت کے دوران عدم اطمینان کا اظہار کیا اور بیرسٹر علی ظفر اور سکندر ذوالقرنین کو نیب کیسز کی پیروی کرنے کی ہدایت کی ہے۔

عمران خان نے اپنی قانونی ٹیم سے مشاورت کے دوران سینئیر قانون دان لطیف کھوسہ کی کارکردگی سے متعلق مایوسی کا اظہار کرتے ہوئے کہا کہ ’نیب کیسز کی کارروائی سے میں مطمئن نہیں، لطیف کھوسہ بغیر تیاری کے آجاتا ہے۔‘

عمران خان نے سینیٹر علی ظفر اور سکندر ذوالقرنین کو پیروی کی ہدایات دے دیں

واضح رہے کہ جمعہ کو 190 پاؤنڈ نیب ریفرنس میں فرد جرم عائد کرنے کی کارروائی مؤخر کردی گئی تھی۔ فرد جرم کی کارروائی 24 جنوری تک ملتوی کی گئی۔ عمران خان کی جانب سے لیگل ٹیم تبدیل ہونے کے باعث عدالت نے کارروائی مؤخر کی۔ آئندہ سماعت پر عمران خان اور بشریٰ بی بی کی جانب سے بیرسٹر علی ظفر، سکندر ذوالقرنین اور عثمان گل پیش ہوں گے۔