الیکشن کمیشن اور انتظامیہ نواز شریف کی مدد کر رہے ہیں، عمران خان

پاکستان تحریک انصاف (پی ٹی آئی ) کے بانی چیئرمین عمران خان نے کہا ہے کہ اس وقت  ’ جو چل رہا ہے وہ مدر آف آل سلیکشن ہے‘ الیکشن کمیشن اور انتظامیہ نواز شریف کی مدد کر رہے ہیں۔

پیر کو بانی پی ٹی آئی نے اڈیالہ جیل میں میڈیا سے گفتگوکرتے ہوئے کہا کہ’ ہمیں ساڑھے 3 سال تک سلیکٹڈ کہا جاتا رہا ہے، اس وقت ملک میں جو بھی چل رہا ہے وہ مدر آف آل سلیکشن ہے۔

انہوں نے کہا کہ نواز شریف کے سپریم کورٹ اور ہائیکورٹ کے تمام کیسز ختم کر دیے گئے ہیں اور الیکشن کمیشن اور انتظامیہ نواز شریف کی مدد کر رہے ہیں۔ان کا کہنا تھا کہ نواز شریف کے بیٹے نے 18 ارب روپے کا گھر بیچا یہ پیسے کہاں سے آئے؟۔ یہ سرٹیفائیڈ منی لانڈرر ہیں۔

اس موقع پر بانی پی ٹی آئی عمران خان کو سپریٹینڈنٹ اڈیالہ جیل نے عمران خان کو بات چیت کرنے سے روکنے کی کوشش لیکن انہوں نے کہا کہ ہمیں بات کرنے کا پورا حق ہے یہ اوپن ٹرائل ہے، غلام بنایا جا رہا ہے یہ الیکشن آزادی کا الیکشن ہے۔

انہوں نے کہا کہ جمہوریت کا مطلب ہی آزادی ہوتا ہے، ہماری تمام تر جدوجہد قانون کی بالادستی کے لیے ہے، یہ کبھی اس ملک میں قانون کی بالادستی نہیں ہونے دیں گے، قوم سے کہتا ہوں کہ اتوار کو سب باہر نکلیں۔