بلوچستان ہائیکورٹ میں انصاف لائرز فورم کے رہنما اقبال شاہ ایڈووکیٹ نے عمران خان کے وارنٹ گرفتاری کے خلاف درخواست جمع کرائی تھی جس میں مؤقف اختیار کیا گیا تھا کہ بجلی روڈ تھانے میں مقدمہ درج نہیں ہو سکتا کیونکہ جس الزام پر مقدمہ درج ہوا وہ بجلی روڈ تھانےکی حدود ہی نہیں بنتی۔
درخواست گزار نے عمران خان کے خلاف درج ایف آئی آر اور ناقابل ضمانت وارنٹ گرفتاری ختم کرنے کی استدعا کی تھی۔
بلوچستان ہائیکورٹ کے جسٹس ظہیر الدین نے درخواست پر مختصر سماعت کی اور چیئرمین تحریک انصاف کے ناقابل ضمانت وارنٹ گرفتاری دو ہفتوں کے لیے معطل کرتے ہوئے فریقین کو نوٹس جاری کردیے۔
پی ٹی آئی وکلا سید اقبال شاہ اور شمس رند نے میڈیا سے گفتگو کرتے ہوئے کہا ’قانون کو بالائے طاق رکھ کے رانا ثناءاللہ کے کہنے پر مقدمات درج ہو رہے ہیں۔ امید ہے کہ یہ مقدمہ بھی ختم ہو جائے گا۔
عمران خان کے خلاف مقدمے کا پس منظر
یاد رہے کہ رواں ماہ 6 مارچ کو عمران خان کے خلاف کوئٹہ کے بجلی روڈ تھانے میں شہری عبدالخلیل کاکڑ کی درخواست پر مقدمہ درج کیا گیا تھا۔
ایف آئی آر الیکٹرانک کرائمز کی روک تھام سمیت دیگر دفعات کے تحت درج کی گئی تھی۔ درخواست گزار نے موقف اختیار کیا تھا کہ عمران خان نے ریاستی اداروں کے خلاف بے بنیاد الزامات عائد کئے اور افسران کے خلاف اشتعال انگیز تقاریر کر کے نفرت پھیلائی۔
واضح رہےکہ کوئٹہ کی عدالت نے گزشتہ روز اداروں کے خلاف ہرزہ سرائی کے کیس میں عمران خان کے ناقابل ضمانت وارنٹ گرفتاری جاری کیے تھے جن کی تعمیل کے لیے کوئٹہ پولیس آج لاہور پہنچی تھی۔
