دو تہائی اکثریت سے الیکشن جیت چکے ہیں، اب اونچی پرواز سے کوئی نہیں روک سکتا، عمران خان

پاکستان تحریک انصاف ( پی ٹی آئی) کے بانی چیئرمین عمران خان نے کہا ہے کہ نواز شریف نے 30 سیٹیں پیچھے ہوتے ہوئے وکٹری سپیچ کر دی ہے، جسے کوئی پاکستانی نہیں مانے گا، پاکستان تحریک انصاف دو تہائی اکثریت سے الیکشن جیت چکی ہے۔

جمعہ کو سماجی رابطے کی ویب سائٹ پر جاری ’اے آئی ‘ جنریٹڈ ویڈیو پیغام میں پاکستان تحریک انصاف ( پی ٹی آئی) کے بانی چیئرمین عمران خان نے کہا کہ پاکستان عوام کو مخاطب کرتے ہوئے کہا کہ ’میرے پاکستانی بھائیو! آپ نے ووٹ دے کر حقیقی آزادی کی بنیاد رکھ دی ہے، میں آپ سب کو الیکشن 2024 جیتنے پر مبارکباد پیش کرتا ہوں۔ مجھے آپ سب پر بھروسا تھا کہ آپ ووٹ دینے نکلیں گے۔

Chairman Imran Khan's victory speech (AI version) after an unprecedented fightback from the nation that resulted in PTI’s landslide victory in General Elections 2024. pic.twitter.com/Z6GiLwCVCR

— Imran Khan (@ImranKhanPTI) February 9, 2024

انہوں نے کہا کہ آپ نے میرے بھروسے کا مان رکھا اور آپ کے بھاری ٹرن آؤٹ نے سب کو حیران کر دیا ہے۔ آپ کے ووٹ کی وجہ سے لندن پلان فیل ہو چکا ہے۔

انہوں نے نواز شریف کو تنقید کا نشانہ بناتے ہوئے کہا کہ آفیشل نتائج کے مطابق 30 سیٹیں پیچھے ہوتے ہوئے بھی نواز شریف نے وکٹری سپیچ کر دی ہے۔ کوئی پاکستانی اسے نہیں مانے گا اور انٹرنیشنل میڈیا بھی اس بے وقوفی پر لکھ رہا ہے۔

ان کا کہنا ہے کہ آزاد ذرائع کے مطابق بقول ان کے دھاندلی شروع ہونے سے پہلے ہم 150 نیشنل اسمبلی نشستوں پر ہم جیت رہے تھے اور اس وقت ہم 170 سے زیادہ نیشنل اسمبلی کی سیٹوں پر جیت رہے ہیں۔

انہوں نے کہا کہ فارم 45 کے ڈیٹا کے مطابق میرے پاکستانیو! آپ سب نے تاریخ رقم کر دی ہے، مجھے آپ پر بہت فخر ہے اور میں اللہ کا شکر ادا کرتا ہوں کہ اس نے ہمیں ایک قوم بنا دیا ہے۔ اب ہمیں اونچی پرواز سے کوئی نہیں روک سکتا۔ آخر میں آپ نے گھبرانا نہیں ہے، خوشیاں منائیں اور شکرانہ کے نفل ادا کریں۔

ان کا کہنا تھا کہ 2 سال کے سخت ظلم اور نا انصافیوں کے باوجود ہم نے 2024 الیکشن دو تہائی اکثریت سے جیت لیا ہے، سب نے آپ کے ووٹ کی طاقت دیکھ لی ہے، اب ووٹ کی حفاظت کی صلاحیت بھی دکھائیں۔