پاکستان تحریک انصاف (پی ٹی آئی) کے بانی عمران خان نے کہا ہے کہ پاکستان میں جمہوریت کا جنازہ نکل چکا ہے۔ بلے کے کیس کی سماعت کے لیے 5 رکنی بینچ ہونا چاہیے تھا۔
اڈیالہ جیل راولپنڈی میں میڈیا سے غیررسمی گفتگو کرتے ہوئے عمران خان نے کہاکہ چیف جسٹس سورۃ المائدہ کی 8ویں آیت پڑھ لیں۔ جس میں ہے کہ دشمنوں سے بھی اتنی نفرت نہ کرو کہ انصاف نہ کر سکو۔
انہوں نے کہاکہ سب کچھ لندن پلان کے تحت ہو رہا ہے، میرا جیل میں ہونا، پی ٹی آئی کا خاتمہ، نواز شریف کے کیس معاف ہونا لندن پلان کا حصہ ہے۔
Related Posts
عمران خان نے کہاکہ سب کچھ یہ بتانے کے لیے ہو رہا ہے کہ وہ قانون سے بالاتر ہیں، توشہ خانہ ریکارڈ پر ہے کہ نواز شریف نے 6 لاکھ میں مرسیڈیز گاڑی لی، مریم نواز نے بی ایم ڈبلیو گاڑی لی۔
انہوں نے کہاکہ ان کے سارے کیسز بند ہیں ہمارا ایک کیس ختم ہوتا ہے تو دوسرا شروع ہو جاتا ہے، مجھے ڈونلڈ لو اور جنرل باجوہ کو ایکسپوز کرنے کی سزا دی جا رہی ہے۔
عمران خان نے کہاکہ افسوس ہوا کہ سپریم کورٹ بھی لندن پلان کے تحت چل رہی ہے، واحد آدمی ہوں جس نے 27 سال جدوجہد کر کے پارٹی کو اس جگہ پہنچایا، ان کو عوام کے غصے کا اندازہ نہیں ہے، سوشل میڈیا کے دور میں کوئی چیز چھپ نہیں سکتی۔
سابق وزیراعظم نے کہاکہ پیش گوئی کر رہا ہوں کہ ان کو بہت بڑا دھچکا لگنے والا ہے، پی ٹی آئی کے امیدواروں کو انتخابی مہم چلانے نہیں دی جا رہی۔ انہیں لوگوں کا غصہ 8 فروری کو نظر آئے گا۔
عوام کے ساتھ ہونے کی وجہ سے پی ٹی آئی کریش نہیں ہوئی
انہوں نے سوال کیاکہ کیا کبھی انہوں نے کسی اور پارٹی کے ساتھ وہ کیا جو ہمارے ساتھ ہوا ہے؟ پارٹی اس وجہ سے کریش نہیں ہوئی کیونکہ عوام ساتھ کھڑی ہے۔
انہوں نے مزید کہاکہ یہ عوام کو بھیڑ بکریاں سمجھتے ہیں، پاکستانی قوم انسان ہے، بھیڑ بکری نہیں، یہ جو ہمارے لوٹے تھے، آپ ان کا 8 فروری کو حال دیکھنا، پی ٹی ائی کے 850 ٹکٹ تھے، مشاورت کے لیے رجسٹر بھی جیل نہیں آنے دیا گیا۔
انہوں نے کہاکہ بلاول کے ساتھ انتخابی اتحاد نہیں ہو سکتا۔ نواز شریف نے جانبدار امپائرز کے بغیر کبھی میچ نہیں کھیلا۔ نواز شریف نے ابھی بھی 2 امپائر کھڑے کیے ہوئے ہیں۔
عمران خان نے کہاکہ ایک امپائر نے نو بال دے دی ہے، دوسرے امپائر کا نام آپ نہیں چلا سکتے۔
