طویل عرصہ رنجشوں کا شکار رہنے کے بعد بالآخر ایران اور سعودی عرب کے مابین باہمی تعلقات کی بحالی پر اتفاق ہو گیا ہے۔
غیر ملکی میڈیا کے مطابق سعودی عرب اور ایران میں اس بات پر اتفاق رائے چین کے دارالحکومت بیجنگ میں ہونے والے مذاکرات کے بعد سامنے آیا جس میں یہ بھی طے پایا کہ دونوں ایک دوسرے کے ملک میں اپنے سفارتخانے بھی دو ماہ کے دوران دوبارہ کھول لیں گے۔
مذاکرات میں یہ فیصلہ بھی کیا گیا کہ دونوں ممالک کے وزرائے خارجہ سفیروں کے تبادلے کے لیے جلد ملاقات کریں گے۔
سعودی عرب اور ایران نے کامیاب مذاکرات کے بعد مشترکہ اعلامیہ بھی جاری کیا ہے۔ جسکے مطابق دونوں ممالک نے ریاستی خودمختاری کا احترام اور ایک دوسرے کے اندرونی معملات میں مداخلت نہ کرنے پر بھی اتفاق کیا ہے۔
مشترکہ اعلامیہ میں کہا گیا ہے کہ دونوں ممالک کے مابین 2001 ء میں طے پانے والے سیکیورٹی میں تعاون کے معاہدے کو فعال بنانے پر بھی اتفاق کیا گیا ہے۔
یاد رہے کہ دونوں مماملک کے درمیان ایک طویل عرصہ سے تعلقات منقطع تھے۔
درین اثنا وائٹ ہاؤس کے قومی سلامتی کونسل کے ترجمان کا کہنا ہے کہ ایران اور سعودی عرب کے سفارتی تعلقات کی بحالی کے حوالہ سے انہیں رپورٹس موصول ہوئی ہیں۔
ترجمان وائٹ ہاؤس کا کہنا ہے کہ امریکا یمن میں جنگ کے خاتمہ اور مشرقی وسطیٰ کے علاقوں میں کشیدگی کم کرنے کی کسی بھی کوشش کا خیر مقدم کرتے ہیں۔
