پاکستان مسلم لیگ (ن) کی بلوچستان سے قومی اسمبلی کے لیے ایک اقلیتی نشست پر 2 امیدوار سامنے آنے کے بعد معاملہ سپریم کورٹ پہنچ گیا ہے۔
بلوچستان سے ن لیگ کی اقلیتی نشست پر 2 امیدواروں کے معاملے پر سماعت چیف جسٹس قاضی فائز عیسیٰ کی سربراہی میں 3 رکنی بینچ نے کی۔
مزید پڑھیں
وکیل حافظ احسان کھوکھر نے عدالت کو بتایا کہ ن لیگ کی صوبائی قیادت نے اشوک کمار کا نام ترجیحی فہرست میں دیا جبکہ مسلم لیگ ن کے مرکزی سیکریٹریٹ نے پیٹرک مسیح کا نام الیکشن کمیشن کو بھیجا، قانون کے مطابق پارٹی سربراہ کی بھیجی گئی فہرست ہی قابل قبول ہوتی ہے۔
ڈی جی لا الیکشن کمیشن نے عدالت کو بتایا کہ پارٹی سربراہ کی فہرست مقررہ وقت کے بعد موصول ہوئی، قانونی طور پر فہرست وہی قابل قبول ہے جو پارٹی سربراہ بھیجے۔
عدالت نے وکلا کے دلائل سننے کے بعد اشوک کمار اور پیٹرک مسیح کا معاملہ الیکشن کمیشن کو بھیج دیا اور ہدایت کی کہ الیکشن کمیشن فریقین کو سن کر قانون کے مطابق فیصلہ کرے۔
