الناصر اسپتال میں اسرائیلی فوج گھس آئی، اجتماعی قبریں بھی اکھاڑ دیں، فلسطینی انتظامیہ

غزہ میں وزارت صحت کی جانب سے اس بات کی تصدیق کی گئی ہے کہ اسرائیلی خصوصی دستوں نے جنوبی غزہ کے خان یونس شہر میں واقع ناصر اسپتال میں داخل ہوکر سینکڑوں افراد کو یرغمال بنا لیا گیا۔

ٹی آر ٹی کے مطابق غزہ میں وزارت صحت کی جانب سے اس بات کی تصدیق کی گئی ہے کہ اسرائیلی خصوصی دستے اسپتال میں داخل ہوئے ہیں جہاں انہوں نے سیکڑوں افراد کو یرغمال بنایا جن میں طبی عملے کے ارکان اور ان کے خاندان کے افراد بھی شامل ہیں۔

اسرائیلی فوج کے ترجمان دانیال ہاگاری نےکہا تھا کہ ان کی افواج ناصر ہسپتال کے اندر ایک درست اور محدود آپریشن کر رہی ہیں۔

وزارت صحت کے ترجمان اشرف القدرہ نے اعلان کیا کہ اسرائیلی فوج نے الناصر میڈیکل کمپلیکس پر دھاوا بول دیا اور جنوبی دیوار کو گرانے اور اس میں سے داخل ہونے کے بعد اسے فوجی بیرکوں میں تبدیل کر دیا ہے جبکہ اسرائیلی فوجی بلڈوزر ان اجتماعی قبروں کو اکھاڑ رہے ہیں جو کمپلیکس کی دیواروں کے اندر بنائی گئی تھیں۔

اسرائیلی فوج نے  گزشتہ روز اعلان کیا کہ خصوصی دستے ناصر ہسپتال کے اندر پہلے سے کام کر رہے ہیں۔

فوج نے مزید کہا کہ اس کے پاس ان قیدیوں کی لاشوں کی موجودگی کے بارے میں پکی معلومات ہیں جنہیں 7 اکتوبر کو حراست میں لیا گیا تھا۔ وہ قیدی غزہ میں اسرائیلی فوجی کارروائیوں کے دوران ہلاک ہوگئے تھے جنہیں حماس کے جنگجو وہاں لے آئے تھے۔ ایک بیان میں مزید کہا  گیا کہ ہمارے قیدیوں کی لاشیں اسپتال میں موجود ہو سکتی ہیں۔

سال 2023 میں دنیا بھر میں قتل ہونے والے صحافیوں کا 70 فیصد غزہ میں مارا گیا، سی پی جے

صحافیوں کی عالمی تنظیم کمیٹی ٹو پروٹیکٹ جرنلسٹ (سی پی جے) کے مطابق سال 2023 میں دنیا بھر میں ہلاک ہونے والے 75 فیصد صحافی غزہ میں جاری اسرائیلی جنگ میں مارے گئے۔

سی پی جے کا کہنا ہےکہ میڈیا کے لیے پچھلی پوری دہائی میں 2023 سب سے خطرناک سال تھا اور دنیا بھر میں قتل ہونے والے 99 صحافیوں میں سے 72 فلسطینی تھے جوکہ غزہ میں جنگ کی رپورٹنگ کر رہے تھے۔