مہنگائی کے اس دور میں آسمان کو چھوتی گاڑیوں کی قیمتوں کے باعث عوام کے لیے نئی گاڑی خریدنا ایک خواب بن کر رہ گیا تھا، اب حکومت نے عوام پر ایک اور ٹیکس کا بوجھ ڈال دیا ہے، اقتصادی رابطہ کمیٹی نے پاکستان میں بننے والی ان گاڑیوں پر 25 فیصد سیلز ٹیکس عائد کر دیا ہے جن کی قیمت 40 لاکھ سے زائد ہے یا پھر جن کا انجن 1400سی سی سے زائد ہے۔
نئے ٹیکس کے نفاذ کے بعد گاڑیوں کی قیمت میں 2 لاکھ 42 ہزار سے 3 لاکھ 2 ہزار روپے تک اضافے کا امکان ہے، وی نیوز نے یہ جاننے کی کوشش کی اس نئے ٹیکس کے نفاذ سے کون سی گاڑیوں کی قیمت میں کتنا اضافہ ہو گا اور آٹو انڈسٹری ایکسپرٹ اس ٹیکس کے نفاذ کو کیسا سمجھتے ہیں۔
مزید پڑھیں
نئے 25 سیلز ٹیکس کے نفاذ سے صرف ان گاڑیوں کی قیمت بڑھیں گی جو کہ 1400cc سے کم ہیں اور ان کی قیمت 40 لاکھ سے زائد ہے کیونکہ وہ گاڑیاں جن کی انجن کیپیسٹی 1400سی سی سے زائد ہے ان پر پہلے سے ہی 25 فیصد سیلز ٹیکس وصول کیا جا رہا ہے۔
آٹو انڈسٹری کے ماہرین کے مطابق نئے سیلز ٹیکس کے نفاذ کے بعد سوزوکی کلٹس وی ایکس ایل کی قیمت میں 2 لاکھ 42 ہزار روپے کا اضافہ ہو گا اور قیمت 40 لاکھ 84 ہزار سے بڑھ کر 43 لاکھ 26 ہزار روپے ہو جائے گی، اسی طرح 2 لاکھ 59 ہزار روپے اضافے کے بعد سوزوکی کلٹس اے جی ایس کی قیمت بڑھ کر 46 لاکھ 25 ہزار ہو جائے گی۔
سوزوکی سوئفٹ جی ایل مینوئل کی قیمت میں 2 لاکھ 57 ہزار اضافہ اور نئی قیمت 45 لاکھ 93 ہزار، سوئفٹ جی ایل سی وی ٹی کی قیمت میں 2 لاکھ 76 ہزار اضافہ اور نئی قیمت 49 لاکھ 30 ہزار روپے جبکہ سوزوکی سوئفٹ جی ایل ایکس سی وی ٹی کی قیمت میں 2 لاکھ 99 ہزار روپے کا اضافہ ہو گا جس کے بعد نئی قیمت 53 لاکھ 39 ہزار ہو جائے گی۔
ٹویوٹا یارس جی ایل آئی مینوئل کی قیمت میں 2 لاکھ 61 روپے اضافہ ہو گا اور نئی قیمت 46 لاکھ 60 ہزار روپے ہو جائے گی، ٹویوٹا یارس جی ایل آئی سی وی ٹی کی نئی قیمت 2 لاکھ 78 ہزار روپے اضافے کے بعد 49 لاکھ 67 ہزار ہو جائے گی، ٹویوٹا یارس اےٹی آئی وی مینوئل کی قیمت میں 2 لاکھ 76 ہزار جبکہ سی وی ٹی کی قیمت میں 2 لاکھ 91 ہزار روپے کا اضافہ ہو گا جس کے بعد نئی قیمت 51 لاکھ 90 ہزار روپے ہو جائے گی، جبکہ ٹویوٹا یارس ایرو سی وی ٹی کی نئی قیمت 3 لاکھ 2 ہزار روپے اضافے کے بعد 54 لاکھ 1 ہزار ہو جائے گی۔
ہونڈا سٹی 1.2 مینوئل کی نئی قیمت 2 لاکھ 79 ہزار روپے اضافے کے بعد 49 لاکھ 78 ہزار ہو جائے گی، ہونڈا سٹی 1.2 سی وی ٹی کی نئی قیمت 2 لاکھ 86 ہزار روپے اضافے کے بعد 51 لاکھ 15 ہزار روپے ہو جائے گی، پروٹون ساگا ایس آٹومیٹک کی نئی قیمت 2 لاکھ 43 ہزار روپے کے اضافے کے بعد 43 لاکھ 42 ہزار ہو جائے گی۔
آٹو انڈسٹری ایکسپرٹ سنیل سرفراز منج کے مطابق اس نئے ٹیکس کے نفاذ کے بعد 3 یا 4 گاڑیاں ایسی ہوں گی، جن کی قیمت میں اضافہ ہو گا جبکہ باقی گاڑیوں پر پہلے سے ہی سیلز ٹیکس ٹیکس وصول کیا جا رہا ہے، ان کا کہنا ہے کہ اس وقت آٹو انڈسٹری مشکل دور سے گزر رہی ہے، گاڑیوں کی فروخت بالکل نہ ہونے کے برابر ہے، اس وقت سیلز ٹیکس بڑھانے سے گاڑیوں کی فروخت میں مزید کمی آئی گی۔
’عوام کے لیے گاڑی خریدنا پہلے ہی مشکل ہے اور اب مزید مشکل ہو گیا ہے، سیلز ٹیکس بڑھانے سے ٹیکس وصولی زیادہ نہیں بلکہ کم ہو گی کیونکہ فروخت ہونے والی گاڑیوں کی تعداد میں بڑی کمی ہو گی، اس وقت ایک گاڑی خریدنے پر حکومت کو 42 فیصد تک ٹیکس وصول ہو رہا ہے۔‘
سنیل سرفراز منج کا کہنا ہے کہ حکومت نے پہلے آٹو انڈسٹری لگانے کے لیے لوگوں کو باہر سے بلایا اور اب اس طرح کے ٹیکس لگا کر ان کے لیے مشکلات پیدا کی جا رہی ہیں، چونکہ گاڑیوں کے پرزے درآمد کیے جاتے ہیں اور آٹو انڈسٹری کو اس ضمن میں کافی مشکلات کا سامنا رہا ہے اس لیے بھی بہت سے پلانٹ بند ہو چکے ہیں۔
’اس پالیسی سے حکومت کو یہ نقصان ہو گا کہ ٹیکس وصولی کا ہدف حاصل نہیں ہو سکے گا، آٹو انڈسٹری مشکل میں آنے سے بہت سے لوگوں کے بےروزگار ہونے کا خدشہ بھی بڑھے گا۔‘
