ملک بھر میں حکومت سازی کے حوالے سے سیاسی جماعتوں نے کوششیں تیز کردی ہیں جبکہ وفاق میں 6 جماعتی اتحاد پر مبنی حکومتی اتحاد نے مرکز اور صوبوں سے متعلق فارمولے طے کر لیا ہے۔
ذرائع کے مطابق اس فارمولے میں مرکز مسلم لیگ ن جبکہ صوبوں میں وہ سیاسی جماعت حکومتی بنائیں گی جو اکثریت حاصل کرنے میں کامیاب رہی ہیں۔
سندھ میں پیپلز پارٹی بھاری اکثریت کے ساتھ حکومت بنانے کی مضبوط پوزیشن میں اور اسی طرح پنجاب میں مسلم لیگ ن کی واضح اکثریت موجود ہے۔
مزید پڑھیں
جہاں تک بلوچستان کا معاملہ ہے تو وہاں کسی ایک جماعت نے بھی بھاری اکثریت حاصل نہیں کی ہے۔ صوبے میں مجموعی طور پر 51 جنرل نشستیں موجود ہیں۔
حالیہ پارٹی پوزیشن کا جائزہ لیا جائے تو مسلم لیگ ن اور جمعیت علمائے اسلام ف 11، 11 نشستوں کے ساتھ سر فہرست ہیں جبکہ پیپلز پارٹی 10 نشستوں کے ساتھ دوسرے نمبر پر تھی تاہم گزشتہ روز 3 آزاد امیدواروں کی پیپلز پارٹی میں شمولیت کے بعد پیپلز پارٹی 13 نشستوں کے ساتھ پہلے نمبر پر پہنچ چکی ہے جس کے بعد وہ پارٹی صوبے میں حکومت بنانے کے لیے فیورٹ ہے۔
سابق صدر آصف علی زرداری کے ترجمان کی جانب سے جاری کردہ بیان کے مطابق چیئرمین بلاول بھٹو، آصف علی زرداری کے ہمراہ کل اسلام آباد پہنچیں گے جہاں بلوچستان میں حکومت سازی سمیت دیگر امور سے متعلق اجلاس بلایا جائے گا۔ اجلاس میں باہمی مشاورت کے بعد وزیر اعلیٰ کی نامزدگی کا فیصلہ کیا جائے گا۔
ترجمان نے بتایا کہ بلوچستان میں پیپلز پارٹی کی حکومت قائم ہوگی جبکہ باہمی مشاورت کے بعد آئندہ 2 روز میں وزیر اعلیٰ بلوچستان کے لیے امیدوار کا نام فائنل کیا جائے گا۔
دوسری جانب صوبائی صدر جعفر مندوخیل نے میڈیا سے گفتگو کرتے ہوئے کہا کہ ن لیگ کا بلوچستان کے وزیراعلیٰ کے حوالے سے پیپلزپارٹی سے اب تک کوئی معاہدہ نہیں ہوا ہے۔
صوبے کے سینیئر صحافی جلال نور زئی نے وی نیوز سے بات کرتے ہوئے کہا کہ بلوچستان میں کسی بھی سیاسی جماعت نے واضح اکثریت حاصل نہیں کی ہے جس کی وجہ سے صوبے میں 2 سے 3 سیاسی جماعتیں مل کر مخلوط حکومت بنائیں گی۔
پاکستان پیپلز پارٹی، مسلم لیگ ن، جمعیت علمائے اسلام ف اور بلوچستان عوامی پارٹی صوبے میں حکومت بنائیں گی جبکہ وزیر اعلیٰ پاکستان پیپلز پارٹی سے ہوگا تاہم حکومت سازی کا سلسلہ جلد مکمل ہو جائے گا۔
