نظام صحت بیماریوں کا متحمل نہیں اس لیے پرہیز علاج سے بہتر ہے، صدر مملکت

صدر مملکت ڈاکٹر عارف علوی نے امراض کے علاج سے زیادہ بچاؤ پر توجہ دینے کی ضرورت پر زور دیتے ہوئے کہا ہے کہ پاکستان میں بیماریوں کا علاج مہنگا ہے اور نظام صحت پر بوجھ پڑتا ہے لہٰذا لوگوں میں احتیاطی تدابیر سے متعلق شعور اجاگر کرنے کی ضرورت ہے۔

منگل کو پاکستان نیشنل ہارٹ ایسوسی ایشن (پناہ) کے وفد سے ملاقات کے دوران گفتگو کرتے ہوئے ڈاکٹر عارف علوی نے کہا کہ غیر متعدی امرض اور امراضِ قلب کی روک تھام کے لیے آگاہی پیدا کرنی ہوگی۔

انہوں نے کہا کہ بیماریوں سے بچاؤ کے لیے میڈیا، مقامی آبادی، مساجد اور غیر سرکاری تنظیموں کو اپنا کردار ادا کرنا ہوگا اور آگاہی پیغام بڑے پیمانے پر لوگوں تک پہنچانے کے لیے جدید پلیٹ فارمز کو بروئے کار لانا ہوگا۔

وفد نے صدر مملکت کو مختلف بیماریوں سے متعلق آگاہی، کنٹرول اور تربیت کے حوالے سے پناہ کی سرگرمیوں کے بارے میں بتایا کہ اپنے قیام سے لے کر اب تک پناہ عوامی آگاہی کے لیے مختلف پلیٹ فارمز کا استعمال کر رہی ہے اور صحت مندانہ سرگرمیوں اور طرزِ زندگی کے بارے مین بھی آگاہی پیدا کرتی ہے۔

پناہ کے صدر میجر جنرل (ر) مسعود الرحمٰن کیانی نے صدر ِمملکت کو غیر متعدی بیماریوں اور امراض قلب کے حوالے سے اپنی تنظیم کے کردار کے بارے میں بریفنگ دی۔

صدر مملکت نے بیماریوں بالخصوص امراض قلب کے حوالے سے آگاہی پیدا کرنے میں پناہ کے کردار کو سراہا۔