ملک دشمن عناصر نے مردم شماری ٹیم کو نشانے پر رکھ لیا،خیبر پختونخوا کے علاقے لکی مروت اور ٹانک میں فرائض کی انجام دہی کے دوران مردم شماری ٹیم پر فائرنگ سے سیکیورٹی پر مامور 2 پولیس اہلکار شہید اور 8 زخمی ہوگئے۔
میڈیا رپورٹس کے مطابق لکی مروت کے علاقے تھانہ صدر کی حدود میں نامعلوم افراد نے مردم شماری ٹیم پر فائر کھول دیا جس کے نتیجے میں سیکیورٹی ڈیوٹی پر مامور پولیس اہلکار شہید ہوگیا جس کی شناخت دل جان کے نام سے ہوئی اور حملہ آور موقع پر فرار ہونے میں کامیاب ہوگئے۔
فرض کی راہ میں ایک اور سپوت مادر وطن پر قربان
لکی مروت : تھانہ صدر کی حدود پیروالہ گاوں میں مردم شماری ڈیوٹی پر تعینات کانسٹیبل دل جان دہشتگردوں کی فائرنگ سے شہادت کے عظیم مرتبے پر فائز ہوگئے۔ pic.twitter.com/YLF4vPJtGK
— KP Police (@KP_Police1) March 13, 2023
دوسرا واقعہ ٹانک میں پیش آیا جہاں تھانہ گومل کی حدود دیہہ مانجھی میں دہشت گردوں نے مردم شماری کی ٹیم کو نشانہ بنایا جب وہ ڈیوٹی کے بعد واپس جارہی تھی جس کے نتیجے میں پولیس اہلکار خان نواب شہید ہوگیا۔
ہماری خاک سے خوشبو وطن کی آئے گی
ہمارا خون اس مٹی کے رنگ میں شامل ہےٹانک : تھانہ گومل کی حدود دیہہ مانجھی میں مردم شماری سیکیورٹی ڈیوٹی سے واپسی پر دہشت گردوں کی فائرنگ سے کانسٹیبل خان نواب شہادت کے عظیم مرتبے پر فائز ہوگئے۔ pic.twitter.com/rGAV5f8dAg
— KP Police (@KP_Police1) March 13, 2023
فائرنگ کے بعد دہشت گرد فرار ہونے میں کامیاب ہو گئے اور پولیس کی نفری نے موقع پر پہنچ کرسرچ شروع کر دیا تاہم آخری اطلاعات تک کوئی گرفتاری عمل میں نہیں آئی ۔
دوسری جانب لکی مروت میں مردم شماری ٹیم پر حملے کی ذمہ داری کالعدم تحریک طالبان پاکستان نے قبول کرلی ہے۔
دریں اثناء ٹانک میں شہید ہونے والے پولیس اہلکار خان نواب کی نماز جنازہ سرکاری اعزاز کے ساتھ ادا کردی گئی جس میں پولیس افسران اور انتظامیہ کے ذمہ داران سمیت سیاسی وسماجی شخصیات نے شرکت کی۔
مردم شماری ٹیم کو اس سے قبل بھی نشانہ بنایا جا چکا ہے
واضح رہے کہ خیبر پختونخوا میں مردم شماری ٹیم پر اس سے قبل بھی ایک حملہ ہوچکا ہے جو 8 مارچ کو ڈیرہ اسماعیل خان میں کیا گیا تھا جس کے نتیجہ میں سیکیورٹی پر مامور پولیس اہلکار شہید ہوگیا تھا جبکہ اس حملے کی ذمہ داری کالعدم تحریک طالبان نے قبول کی تھی۔
یاد رہے کہ اس سے قبل 18 دسمبر 2022 کو ضلع لکی مروت کے تھانے پر دہشت گردوں نے حملہ کیا تھا جس کے نتیجے میں 4 پولیس اہلکار شہیداور 4 زخمی ہوگئے تھے۔
