اسپیکر قومی اسمبلی اور ڈپٹی اسپیکر کے عہدوں کے لیے جمع کروائے گئے کاغذات نامزدگی منظور کرلیے گئے، دونوں عہدوں کے لیے انتخاب کل بروز جمعہ عمل میں لایا جائے گا۔
قومی اسمبلی سیکریٹیریٹ کے اعلامیہ کے مطابق قومی اسمبلی کے اسپیکر کے عہدے کے لیے لیگی امیدوار سردار ایاز صادق اور سنی اتحاد کونسل کے ملک محمد عامر ڈوگر کے کاغذات نامزدگی سیکریٹری قومی اسمبلی کو جمع کرائے گئے تھے۔
مزید پڑھیں
اسپیکر قومی اسمبلی کے نامزد امیدوار سردار ایاز صادق کے تجویز کنندان میں چوہدری سالک حسین، عبدالعلیم خان، سید نوید قمر اور اویس احمد لغاری شامل تھے، دوسری جانب ملک عامر ڈوگر کے تجویز کنندان میں صاحبزادہ صبغت اللہ، علی محمد اور ڈاکٹر امجد علی خان شامل تھے۔
قومی اسمبلی کے ڈپٹی اسپیکر کے لیے پیپلز پارٹی کے سید غلام مصطفی شاہ اور سنی اتحاد کونسل کے جنید اکبر کے کاغذات نامزدگی سیکریٹری قومی اسمبلی کو جمع کرائے گئے تھے۔
ڈپٹی اسپیکر کے لیے نامزد امیدوار غلام مصطفیٰ شاہ کے لیے تجویز کنندان میں محمد رضا حیات ہراج اور اعجاز حسین جاکھرانی شامل ہیں، جبکہ جنید اکبر کے تجویز کنندان میں محمد ثناء اللہ خان مستی خیل، محمد ریاض خان فتیانہ اور مہر غلام محمد لالی شامل ہیں۔
