بلوچستان میں پاکستان تحریک انصاف (پی ٹی آئی) کے انٹراپارٹی الیکشن کے لیے 3 پینل میدان میں اترگئے۔
انٹرا پارٹی الیکشن کے لیے سابق صوبائی صدر منیر بلوچ، امین جوگیزئی اور داؤد شاہ کے پینل ایک دوسرے کے مقابلے میں ہیں۔
مزید پڑھیں
منیر بلوچ کے پینل کو قاسم سوری اور سابق گورنر ظہور آغا کی حمایت حاصل۔ پی ٹی آئی بلوچستان کے اراکین 3 جنوری کو اپنا حق رائے دہی استعمال کریں گے۔
انٹرا پارٹی الیکشن کے لیے پی ٹی ائی نے ووٹر لسٹ جاری کردی ہے۔ صوبے بھر میں 11 ہزار سے زائد ممبرز بطور ووٹرز رجسٹرڈ ہیں۔
یاد رہے کہ پی ٹی آئی نے 3 مارچ کو انٹرا پارٹی الیکشن کرانے کا اعلان کیا تھا۔ جاری کردہ انتخابی شیڈول کے مطابق انتخابات میں حصہ لینے والے امیدواروں نے 23 اور 24 فروری کو کاغذات نامزدگی جمع کروائے۔ اسکروٹنی 25 فروری کو کی گئی اور حتمی فہرست 27 فروری کو جاری ہوئی۔
قبل ازیں پی ٹی آئی نے 5 فروری کو انٹرا پارٹی الیکشن کرانے کا اعلان کیا تھا لیکن بعد میں کارکنان کی عام انتخابات میں مصروفیات کے پیش نظر انٹرا پارٹی الیکشن کی تاریخ میں توسیع کردی گئی۔
یہاں یہ بات قابل ذکر ہے کہ پارٹی چیئرمین اور سیکریٹری جنرل کے عہدوں پر امیدواران بلامقابلہ منتخب ہوچکے ہیں۔ پی ٹی آئی کی جانب سے 29 فروری کو جاری نوٹیفکیشن کے مطابق بانی چیئرمین عمران خان کے حمایت یافتہ بیرسٹر گوہر خان بلا مقابلہ چیئرمین جب کہ عمر ایوب مرکزی سیکریٹری جنرل منتخب ہوگئے۔ دونوں رہنماؤں کے مقابلے میں کسی پارٹی کارکن نے کاغذات نامزدگی نہیں جمع کرائے تھے۔
