خیبر پختونخوا کے علاقے ٹانک میں مردم شماری کی ٹیم پرفائرنگ کرنے والے حملہ آوروں کا سکیورٹی فورسز کے ساتھ فائرنگ کا تبادلہ ہواہے جس کے نتیجہ میں دہشت گرد کمانڈر عبدالرشید عرف رشیدی ہلاک ہوگیا ہے۔
آئی ایس پی آر کے مطابق ٹانک کے علاقے رغزئی میں مردم شماری ٹیم پر حملہ کرکے پولیس اہلکار کوشہید کرنے کے بعد فرار ہونے والے دہشت گردوں کا سیکیورٹی فورسز نے محاصرہ کیا اور تمام ممکنہ راستوں کو بندکردیا جس کے بعد دہشت گردوں کو ڈیرہ اسماعیل خان کی تحصیل کلاچی کے علاقے گڑہ گلداد میں روکا گیا۔
دہشت گردکمانڈرسیکیورٹی فورسزپرحملوں میں ملوث تھا
مارا جانے والا دہشت گرد کمانڈر عبدالرشید عرف رشیدی سیکیورٹی فورسز کے خلاف متعدد حملوں میں ملوث ہونے کے ساتھ ساتھ معصوم شہریوں کے قتل میں بھی پولیس کومطلوب تھا۔
ترجمان آئی ایس پی آر کے مطابق لوگوں نے دہشت گردی کے خاتمہ کے لیے آپریشن کرنے پر سیکیورٹی فورسز کے عزم کو سراہا ہے۔
واضح رہے کہ دہشت گردوں نے مردم شماری ٹیم کو نشانے پر رکھا ہوا ہے۔ انھوں نے پیر کو ٹانک اور لکی مروت میں فائرنگ کرکے مردم شماری کی ٹیم کی سیکیورٹی پر مامور 2 پولیس اہلکاروں کو شہید کردیا جبکہ اس سے قبل 8 مارچ کو ڈیرہ اسماعیل خان میں بھی مردم شماری ٹیم کی سیکیورٹی پر مامور پر ایک پولیس اہلکار کو فائرنگ کرکے شہید کردیا گیا تھا۔
