پاکستان سپر لیگ (پی ایس ایل) سیزن 9 کے آج کے میچ میں ملتان سلطانز نے کراچی کنگز کو 20 رنز سے شکست دے کر پلے آف مرحلے کے لیے کوالیفائی کر لیا۔
کراچی میں کھیلے گئے میچ میں ملتان سلطانز کے کپتان محمد رضوان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 3 وکٹوں کے نقصان پر 189 رنز بنائے، جبکہ جواب میں کراچی کنگز کی ٹیم 20 اوورز میں 7 وکٹوں کے نقصان پر 169 رنز پر ڈھیر ہو گئی۔
Sultans Supremacy in Karachi ✅
Multan keep their place at the top of the standings after achieving a commanding win over Karachi 🏏#HBLPSL9 | #KhulKeKhel | #KKvMS pic.twitter.com/jwuamcGz1z
— PakistanSuperLeague (@thePSLt20) March 3, 2024
ملتان سلطانز کی بیٹنگ
ملتان سلطانز نے پہلے بیٹنگ کرتے ہوئے مقررہ 20 اوورز میں 3 وکٹوں کے نقصان پر 189 رنز بنائے۔ ملتان سلطانز کے بیٹر عثمان خان نے 106 رنز کی شاندار اننگز کھیلی۔
اس کے علاوہ کپتان محمد رضوان نے 58 رنز بنائے جبکہ ریز ہینڈرکس 13 اور افتخار احمد 4 رنز بنا کر آؤٹ ہوئے۔
کراچی کنگز کے بولر مزرابانی نے 2 کھلاڑیوں کو آؤٹ کیا، جبکہ حسن علی کے حصے میں ایک وکٹ آئی۔
کراچی کنگز کی بیٹنگ
جواب میں کراچی کنگز کی ٹیم 190 رنز کے ہدف کے تعاقب میں مقررہ 20 اوورز میں 7 وکٹوں کے نقصان پر 169 رنز بنا سکی۔
کراچی کنگز کی جانب سے شعیب ملک نے 38 رنز کی اننگز کھیلی جبکہ شان مسعود 36 رنز بنا کر نمایاں رہے۔
اس کے علاوہ کوئی کھلاڑی وکٹ پر جم کر نہ کھیل سکا، عرفان خان 23، حسن علی 17، لیوس ڈوپلوئے 12 جبکہ جیمز وینس 7 رنز بنا سکے۔ جبکہ محمد نواز 27 رنز اسکور کر کے ناٹ آؤٹ رہے۔
ملتان سلطانز کی جانب سے اسامہ میر نے 2 کھلاڑیوں کو پویلین کی راہ دکھائی، جبکہ ڈیوڈ ولی، محمد علی، کرس جارڈن اور خوشدل شاہ کے حصے میں ایک ایک وکٹ آئی۔
واضح رہے کہ آج کے میچ کے لیے کراچی کنگز اور ملتان سلطانز نے اپنی اپنی ٹیموں میں 2،2 تبدیلیاں کیں۔ کنگز میں کیرون پولارڈ اور انور علی کی جگہ لوئس ڈپلائے اور میر حمزا شامل ہوئے۔
جبکہ ملتان سلطانز نے آفتاب ابراہیم اور شاہ نواز دھانی کی جگہ کرس جارڈن اور ڈیوڈ ویلے کو ٹیم کا حصہ بنایا۔
پوائنٹس ٹیبل کی موجودہ پوزیشن کے مطابق ملتان سلطانز 7 میچوں میں کامیابی حاصل کر کے 12 پوائنٹس کے ساتھ پہلے نمبر پر موجود ہے اور پہلے آف میں میں پہنچنے والی پہلی ٹیم بن گئی ہے۔
