آئندہ ہفتے خیبر پختونخوا، گلگت بلتستان، مری اور گلیات میں شدید بارشیں اور برفباری متوقع ہے۔ لینڈ سلائیڈنگ اور شدید برفباری کے باعث رابطہ سڑکیں بلاک ہونے کا بھی امکان ہے۔ سیاحوں اور مسافروں کی حفاظت کو یقینی بنانے کے لیے موسمی صورتحال سے آگاہی کے لیے حفاطتی ہدایات جاری کر دی گئی ہیں۔
این ڈی ایم اے نے تمام پی ڈی ایم ایز اور دیگر متعلقہ انتظامی اداروں کو کسی بھی قسم کی ہنگامی صورتحال سے نمٹنے کے لیے الرٹ رہنے کی ہدایات جاری کی ہیں۔ مقامی انتظامیہ پہاڑی و برفانی علاقوں میں ایمرجنسی عملہ و مشینری کی بروقت دستیابی کو یقینی بنانے کے لیے بروقت اقدامات کریں۔
مزید پڑھیں
این ڈی ایم اے نے کہا ہے کہ ممکنہ خطرے سے دوچار آبادیوں سے لوگوں کے بر وقت انخلاء کو یقینی بنایا جائے۔ متعلقہ محکمے ندی، نالوں میں پانی کے بہاؤ کی مسلسل مانیٹرنگ جاری رکھیں۔ تمام متعلقہ محکمے رابطے اور معاونت کے دائرہ کار کو مستحکم بنائیں۔
کاشتکار موسم کو مدنظر رکھتے ہوئے زرعی سرگرمیوں سر انجام دیں۔ سیاح پہاڑی علاقوں کے موسمی حالات کو مدنظر رکھتے ہوئے سفر کا ارادہ کریں۔ جس علاقے میں سفر کا ارادہ ہو، وہاں کی انتظامیہ کے اہم نمبر پاس رکھیں۔
حفاظتی ہدایات میں کہا گیا ہے کہ عوامی آگاہی کے لیے مقامی زبانوں میں پیغامات کی تشہیر یقینی بنائی جائے۔ لینڈ سلائیڈنگ اور سیلابی خدشے کے زیرِ اثر علاقوں میں ایمرجنسی عملہ و مشینری کی قبل از وقت فراہمی یقینی بنائی جائے۔
این ڈی ایم اے کے مطابق ممکنہ آفات کی قبل از وقت آگاہی اور حفاظتی تدابیر عوام تک پہنچانے کے لیے جلد ہی موبائل ایپلیکیشن کا آغاز بھی کیا جا رہا ہے۔
