پاکستان تحریک انصاف نے پنجاب میں سرکاری منصوبوں اور مختلف محکموں پر نظر رکھنے کے لیے شیڈو کابینہ بنانے کا اعلان کیا ہے، اس ضمن میں پارٹی قیادت کی ارکان اسمبلی کی مشاورت بھی ہو چکی ہے، امکان ظاہر کیا جا رہا ہے کہ شیڈو کابینہ کی تشکیل رواں ہفتے ہی ہو جائے گی۔
پنجاب اسمبلی میں اپوزیشن لیڈر اور پی ٹی آئی رہنما رانا آفتاب نے وی نیوز سے خصوصی گفتگو کرتے ہوئے کہا کہ پارٹی نے تمام سرکاری محکموں اور منصوبوں پر کڑی نظر رکھنے کے لیے شیڈو کابینہ کی تشکیل کا فیصلہ کیا ہے، جو صوبے بھر میں ترقیاتی کاموں کی نوعیت اور ان پر عملدرآمد پر نظر رکھے گی۔
مزید پڑھیں
’اس ضمن میں دیکھا جائے گا کہ کیا کوئی کرپشن، یا پیسے کا بے دریغ استعمال تو نہیں ہورہا، یا کسی مخصوص کمپنی یا فیکٹری کو فائدہ تو نہیں پہنچایا جا رہا۔‘
شیڈو کابینہ کے دفاتر کہاں ہوں گے اور کیا کوئی وزیر بھی ہو گا؟ اس سوال کے جواب میں رانا آفتاب نے کہا کہ ہمارے پاس اپوزیشن چیمبر موجود ہے، اسی کو استعمال کرتے ہوئے اس ’جمہوری مشق‘ کو ممکن بنایا جائےگا۔
رانا آفتاب کے مطابق شیڈو کابینہ کا خیال اس لیے آیا کہ اپوزیشن جماعت آئندہ آنے والی حکومت ہوتی ہے، ہمارے ارکان کو ضرور معلوم ہونا چاہیے کہ کون سا منصوبہ کیسے اور کب مکمل ہو گا۔
رانا آفتاب کا کہنا ہے کہ شیڈو کابینہ میں وزیر تو کوئی نہیں ہو گا تاہم کسی ایک رکن اسمبلی کو کوئی بھی ایک وزارت یا محکمہ سونپا جائے گا تاکہ اس سے متعلق کسی قرارداد کی تیاری سے لے کر اس محکمے میں کسی قسم کی کرپشن کی نشاندہی کا فریضہ سرانجام دیا جاسکے۔
رانا آفتاب کے مطابق شیڈو وزرا متعلقہ صوبائی وزرا سے متوقع سوالات کی تیاری سمیت ان تمام وزارتوں اور محکموں پر کڑی نظر رکھیں گے کہ تاکہ مستقبل میں حکومتی کردار ادا کرنے پر ہماری کارکردگی مزید بہتر ہوسکے۔
