وزیراعلیٰ پنجاب مریم نواز نے پنجاب انسٹیٹیوٹ آف کارڈیالوجی کا دورہ کیا اور مریضوں کو دی جانے والی سہولیات کا جائزہ لیا۔
مریم نواز وزارت اعلیٰ کا حلف اٹھانے کے بعد خاصی متحرک ہیں اور وہ اسپتالوں سمیت دیگر اداروں کے سرپرائز دورے کر رہی ہیں۔
مریم نواز نے پنجاب انسٹیٹیوٹ آف کارڈیالوجی کے دورے کے موقع پر ایمرجنسی بلاک اور استقبالیہ کاؤنٹر کا معائنہ کیا۔ وزیراعلیٰ نے مریضوں کے مسائل معلوم کیے اور ان کے ساتھ تصاویر بھی بنوائیں۔
مزید پڑھیں
مریم نواز نے ایک مریض کی شکایت پر کہاکہ بہت جلد گھروں تک ادویات سروس شروع کرنے جا رہے ہیں۔
مریم نواز وارڈ میں آئیں تو پشاور کی زیرعلاج مریضہ واجدہ گل ان سے بات کرتے ہوئے آبدیدہ ہو گئیں۔ ان کا کہنا تھا کہ مجھے دل کا علاج کرانے کے لیے پشاور سے یہاں آنا پڑا۔ لاہور میں علاج کی اچھی سہولیات میسر ہیں۔
وزیراعلی پنجاب محترمہ مریم نواز شریف اچانک پنجاب انسٹی ٹیوٹ آف کارڈیالوجی پہنچ گئیں امید سحر وزیراعلی پنجاب محترمہ مریم نواز شریف نے پی آئی سی ایمرجنسی بلاک کا دورہ کیا pic.twitter.com/FFrvWcawyc
— Faizi SMT SWL (@tahir_fuzail) March 13, 2024
اس موقع پر وزیراعلیٰ مریم نواز نے ہدایت کی کہ مریضہ کو علاج معالجے کی بہترین سہولیات فراہم کی جائیں۔
مریم نواز نے اسپتال کے بستر پر گندی بیڈشیٹس دیکھ کر ناپسندیدگی کا اظہار کیا، جبکہ وارڈ میں نصب اے سی کا پانی زمین پر گرنے کی نشاندہی کرتے ہوئے کہاکہ یہاں سے صفائی کی جائے۔
ایک بزرگ مریضہ نے مریم نواز سے گفتگو کرتے ہوئے کہاکہ ہمارا لیڈر نواز شریف ہے، ان کو میرا سلام کہنا۔
وزیراعلیٰ مریم نواز ایمرجنسی کاؤنٹر پر گئیں اور نرسوں کے مسائل سننے کے بعد متعلقہ حکام کو فوری اقدامات کی ہدایت کی۔
