حکومتی وزرا تحریک انصاف کے خوف سے لرز رہے ہیں، اعجازچوہدری

پی ٹی آئی کے سینیٹر اعجاز احمد چوہدری نے کہا ہے کہ ہم دہشت گردی کی شدید الفاظ میں مذمت کرتے ہیں ملک و قوم کی خاطر جانیں قربان کرنے والوں کی قوم قدردان ہے خراجِ تحسین پیش کرتے ہیں۔

انسداد دہشت گردی عدالت (اے ٹی سی) میں پیشی کے موقع پر میڈیا کے نمائندوں سے غیر رسمی گفتگو کرتے ہوئے ان کا کہنا تھا کہ حکومتی وزرا خواب میں بھی تحریک انصاف کے خوف سے لرز رہے ہیں، باہر نکلیں اور دہشت گردی کا سدباب کریں۔

اعجاز احمد چوہدری کا کہنا تھا کہ 3 پارٹیوں کی حکومت نے پاکستان پر برائے فروخت کا ٹیگ لگا رکھا ہے۔ بجلی ،گیس اور پانی کے بلوں نے غریب کی چیخیں نکلوا دی ہیں یہ کم از کم اپنے اعلان کردہ اعلانات پر ہی عمل درآمد کر لیں پی ٹی آئی پر تنقید سے مسائل حل نہیں ہوں گے۔

ان کا کہنا تھا کہ حکومتوں کو تمام کام چھوڑ کر غریب کی روٹی کا انتظام کرنا چاہیے اور عوام کو مہنگائی کے طوفان سے بچائیں۔