اسلام آباد کی ڈسٹرکٹ اینڈ سیشن کورٹ نے پاکستان تحریک انصاف (پی ٹی آئی) کے بانی عمران خان کی لانگ مارچ توڑپھوڑ کے 2 مقدمات میں بریت کی درخواست منظور کر لی۔
مزید پڑھیں
تفصیلات کے مطابق، جوڈیشل مجسٹریٹ شائستہ کنڈی نے لانگ مارچ کے دوران توڑ پھوڑ کے 2 مقدمات میں عمران خان کی بریت کی درخواستوں پر سماعت کی۔ عمران خان کے وکلا نعیم پنجوتھا، سردارمصروف اور آمنہ علی عدالت میں پیش ہوئے۔
دوران سماعت عدالت نے بانی پی ٹی آئی کو عدالت میں پیش کرنے کی درخواست مسترد کردی اور ریمارکس دیے اگر عمران خان کو عدالت لاتے ہوئے راستے میں کچھ ہوگیا توکون ذمہ دارہوگا۔
عدالت کے استفسار پر وکیل نعیم پنجوتھا نے کہا کہ بانی پی ٹی آئی اس سے قبل بھی خود سے عدالتوں میں پیش ہوتے رہے ہیں، ہم ان کی موجودگی میں دلائل دینا چاہتے ہیں۔
اس پر مجسٹریٹ نے کہا کہ ضمانت پرحاضری ضروری ہوتی، درخواست پروڈکشن پرنہیں، پہلے بانی پی ٹی آئی کی بریت کی درخواست پربحث کرلیں۔
عدالت نے عمران خان کے وکلا کے دلائل مکمل ہونے کے بعد ان کی بریت کی درخواستوں پر فیصلہ محفوظ کرلیا۔ بعد ازاں، عدالت نے فیصلہ سناتے ہوئے عمران خان کی بریت کی درخواستوں کو منظور کرلیا۔
واضح رہے کہ بانی پی ٹی آئی عمران خان کے خلاف تھانہ لوہی بھیر اور سہالہ میں مقدمات درج کیے گئے تھے۔
