وزیراعظم شہبازشریف کا تربت نیول ایئر بیس پر دہشت گردوں کا حملہ ناکام بنانے پر سیکیورٹی فورسز کو خراج تحسین

وزیراعظم محمد شہبازشریف نے تربت نیول ایئر بیس پر دہشت گردوں کا حملہ ناکام بنانے پر سیکیورٹی فورسز کو خراج تحسین پیش کرتے ہوئے کہا ہے کہ سیکیورٹی فورسز کی بروقت اور مؤثر کارروائی سے دہشت گرد ہلاک ہوئے اور ہم ایک بڑے نقصان سے بچ گئے۔

وزیراعظم میڈیا آفس سے جاری بیان کے مطابق وزیر اعظم نے کہا کہ ہم دہشت گردی کے عفریت کو کچلنے کے لیے پر عزم ہیں۔ پوری قوم اپنی بہادر سیکیورٹی فورسز کے ساتھ کھڑی ہے اور انہیں سلام پیش کرتی ہے۔

دہشت گردوں کی پاک بحریہ کی بیس پی این ایس صدیق پر حملے کی کوشش ناکام، 4 دہشت گرد ہلاک

تربت میں پاک بحریہ کی بیس پی این ایس صدیق پر دہشت گردوں کی حملے کی کوشش کو سیکیورٹی فورسز نے مؤثر اور فوری جواب دیتے ہوئے ناکام بنا دیا ہے۔ فورسز کے فوری جواب میں 4 دہشت گرد ہلاک کر دیے گئے ہیں۔ شدید فائرنگ کے تبادلے میں ایف سی بلوچستان کے سپاہی نعمان فرید شہید ہو گئے۔

پاک فوج کے شعبہ تعلقات عامہ (آئی ایس پی آر) کے مطابق بحری دستوں کی مدد کے لیے ارد گرد میں موجود سیکیورٹی فورسز کو فوری طور پر متحرک کیا گیا، مسلح افواج کے ہم آہنگ اور مؤثر جواب نے مشترکہ کلیئرنس آپریشن میں 4 دہشت گردوں کو ہلاک کرنے میں مدد دی۔

آئی ایس پی آر کا کہنا ہے کہ حملہ 25 اور 26 مارچ کی درمیانی رات کو کیا گیا تھا۔ علاقے میں پائے جانے والے کسی دوسرے دہشت گرد کو ختم کرنے کے لیے کلیئرنس آپریشن کیا جا رہا ہے۔ مسلح افواج ملک سے دہشت گردی کی لعنت کو ہر قیمت پر ختم کرنے کے لیے پُر عزم ہیں۔