ججز کے خط کے معاملے پر انکوائری کمیشن کا قیام وقت کی ضرورت ہے، شوکت صدیقی

اسلام آباد ہائیکورٹ کے جسٹس ریٹائرڈ شوکت عزیزصدیقی نے کہا ہے کہ انہوں نے سب سے پہلے عدالتی امور میں مداخلت کے بارے انکوائری کمیشن کے قیام کا مطالبہ کیا تھا لیکن بدقسمتی سے ایگزیکٹو کی طرف سے نہ ہی عدلیہ کی جانب سے اس معاملے پرکوئی قدم اٹھایا گیا۔ سپریم جوڈیشل کونسل نے بھی اس معاملے کی انکوائری کرنا مناسب نہیں سمجھا۔

فیض حمید اور بریگیڈیر عرفان کا نام دیا

ایک سوال کے جواب میں انہوں نے کہا کہ اگر آپ سے کوئی رابطہ کرتا ہے تو آپ کو اس کے نام کا تو پتا ہوتا ہے، میں نے فیض حمید اور بریگیڈیر عرفان کا نام دیا، ایسا بالکل نہیں ہے کہ غیر مرحی قوتیں اپنے وجود کے بغیر آ کر آپ سے کوئی بات کر جاتی ہیں، ایسی باتوں کے پیچھے کوئی تو ہوتا ہی ہے۔

کمروں میں کیمرے کون نصب کرتا ہے، تفتیش ہو گی تو کٹھ پتلی پکڑا جائے گا

مثال کے طور پر اگر آپ کے کمرے میں کیمرے لگے ہوئے ہیں تو اس کی انکوائری تو آسان ہے کہ کمیرے لگانے والوں سے پوچھا جائے کہ یہ کس کے حکم پر اور کیوں لگائے گئے۔ آخر میں آپ کسی کٹھ پتلی تک پہنچ ہی جائیں گے۔

جسٹس ریٹائرڈ شوکت عزیز صدیقی نے بتایا کہ ’ میں نے اپنے جوڈیشل آرڈرز میں 6 سے 8 مرتبہ اوبزرویشنز دے کر وہ آرڈر چیف آف آرمی سٹاف جنرل قمر جاوید باجوہ کو بجھوائے کہ آپ کے لوگ یہ کر رہے ہیں لیکن ان پر کچھ نہیں کیا گیا۔

ثاقب نثار نے میرے متعلق بھی کہنا تھا کہ ’ انیہوں وی مسنگ پرسنزوچ شامل کر دیو‘ ۔

انہوں نے کہا کہ میں اس وقت اس پوزیشن میں بھی نہیں تھا کہ میں اپنے آرڈرز پر توہین عدالت کا مقدمہ چلاتا کیوں کہ اوپر اس وقت چیف جسٹس ثاقب نثار بیھٹے ہوئے تھے، مجھے پتا تھا کہ انہوں نے میرے متعلق بھی یہی کہنا تھا کہ ’ انیہوں وی مسنگ پرسنزوچ شامل کر دیو‘ ۔

انہوں نے کہا کہ حمود الرحمان رپورٹ پر بھی کچھ نہیں ہوا، سپریم کورٹ کا یا کوئی بھی جج جب حلف اٹھاتا ہے تو اس کو اس بات کا پتا ہوتا ہے کہ اس نے انصاف کا نظام کیسے چلانا ہے، حلف اٹھاتے ہوئے جج یہی کہتا ہے کہ اس نے بغیر کسی خوف اور خطرے کے انصاف مہیا کرنا ہے۔

انہوں نے کہا کہ ایگزیکٹو اور عدلیہ کی طرف سے جو بھی کمیشن قائم ہو گا اس کے پاس تمام تر اختیارات ہوں گے، ان کے پاس اتنے ہی اختیارات ہوں گے جتنے ایک حاضر سروس جج کے پاس ہوتے ہیں۔

ایک سوال کے جواب میں انہوں نے کہا کہ سپریم کورٹ کے ان 6 ججز کو انکوائری کمیشن کے ہائیکورٹ کے ججز کے سامنے پیش ہونے میں کوئی حرج نہیں ہونی چاہیے کیوں کہ کمیشن کی صورت میں ان کے پاس بھی برابر کے اختیارات ہوں گے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں