وزیراعظم شہباز شریف نے روسی صدر کو دورہ پاکستان کی دعوت دیدی

وزیر اعظم شہباز شریف نے ماسکو حملے میں قیمتی جانوں کے ضیاع پر افسوس کا اظہار کرتے ہوئے کہا ہے کہ پاکستان اس مشکل گھڑی میں روس کے ساتھ یکجہتی کے لیے کھڑا ہے۔ وزیراعظم نے روسی صدر کو دورہ پاکستان کی دعوت بھی دی۔

اسلام آباد میں روس کے سفیر سے ملاقات کے دوران وزیر اعظم شہباز شریف نے مختلف اہم امور پر گفتگو کی۔ ملاقات کے آغاز پر وزیراعظم نے ماسکو حملے میں قیمتی جانوں کے ضیاع پر گہرے دکھ اور افسوس کا اظہار کیا۔ انہوں نے واضح کیا کہ پاکستان مصیبت کی اس گھڑی میں اظہار یکجہتی کے لیے روس کے ساتھ کھڑا ہے۔

وزیراعظم نے کہا کہ پاکستان روس کے ساتھ مختلف شعبوں بالخصوص توانائی، تجارت اور سرمایہ کاری میں دو طرفہ تعاون کو بڑھانا چاہتا ہے۔ انہوں نے بین الحکومتی کمیشن آئی جی سی کا 9واں اجلاس جلد بلانے کی ضرورت پر بھی زور دیا، بین الحکومتی کمیشن اجلاس کی میزبانی اس سال کے آخر میں روس کرے گا۔

وزیراعظم نے روسی سفیر سے کہا کہ تجارتی تعلقات اور سرمایہ کاری کو بڑھانے کے طریقوں کی نشاندہی کے لیے روس اپنا وفد پاکستان بھیجے۔ انہوں نے روسی صدر پیوٹن کو جلد پاکستان کا دورہ کرنے کی دعوت کا اعادہ بھی کیا۔

اس موقع پر روسی سفیر نے کہا کہ روس پاکستان کے ساتھ مضبوط تعلقات استوار کرنا چاہتا ہے۔ روسی سفیر کا کہنا تھا کہ توانائی، تجارت اور سرمایہ کاری کے علاوہ تعلیم اور ثقافت میں بھی تعاون بڑھانے کے خواہاں ہیں۔