اپنے معصومانہ وی لاگنگ اسٹائل کے باعث شہرت حاصل کرنے والے شیراز کے پوری دنیا میں خوب چرچے ہورہے ہیں۔ گلگت بلتستان سے اپنی ڈیلی وی لاگنگ کے ذریعے شہرت حاصل کرنے والے محمد شیراز کو ان کے معصومانہ انداز کی وجہ سے پسند کیا جاتا ہے۔
حال ہی میں انہوں نے اپنے آفیشل یوٹیوب چینل پر ایک ویڈیو اپلوڈ کی جس میں وہ صارفین کی جانب سے پوچھے گئے سوالات کے جوابات دے رہے ہیں، اس ویڈیو میں شیراز سے سوال کیا گیا کہ ان کا پسندیدہ کھلاڑی کون سا ہے؟ جس کے جواب میں شیراز نے فاسٹ بالر شعیب اختر کو اپنا پسندیدہ کھلاڑی قرار دیا۔
شیراز نے کہا کہ ’شعیب اختر بہت خطرناک اور اچھی باؤلنگ کرتے ہیں‘۔
واضح رہے گلگت بلتستان سے تعلق رکھنے والے 7 سالہ وی لاگر محمد شیراز کی ویڈیوز سوشل میڈیا پرخوب وائرل ہیں، شیراز نے اپنے یوٹیوب چینل پر ’شیرازی ولیج وی لاگز‘ کے عنوان سے دلکش ویڈیوز اپ لوڈ کرنے کے بعد شہرت حاصل کی۔
مختصر وقت میں شیراز نے یوٹیوب کا سلور پلے بٹن حاصل کیا اور ان کے چینل پر 10 لاکھ سے زیادہ سبسکرائبرز ہیں۔ شیراز نے حال ہی میں وزیراعظم شہباز شریف سے بھی ملاقات کی۔
اس سے قبل محمد شیراز نے ایک ویڈیو سوشل میڈیا پر لگائی جس میں وہ گلگت بلتستان میں انٹرنیٹ کی اسپیڈ کم ہونے کا گلہ کررہے تھے، تاہم ان کی ویڈیو وائرل ہونے پر پاک فوج کی جانب سے ان کو جدید وی لاگنگ آلات اور انٹرنیٹ ڈیوائس تحفہ میں دی گئی، جس پر محمد شیراز خوشی سے نہال ہوگئے۔
