پنجاب کو جرائم اور کرپشن فری صوبہ بنانے کے لیے اصلاحات کا گرینڈ پیکج تیار کر لیا گیا، پولیس، پراسیکیوشن اور عدالتی نظام کی جامع اصلاحات کے لیے تاریخی قانونی سازی کا بل منظور کرانے کا بھی فیصلہ کیا گیا۔
وزیر اعلیٰ پنجاب مریم نواز شریف کی زیر صدارت مری میں خصوصی اجلاس میں اہم فیصلے کیے گئے، قانون سازی کے لیے تجاویز کی فوری تیاری کی ہدایت کی گئی ہیں۔
اجلاس میں فیصلہ کیا گیا کہ عورتوں اور بچوں سے زیادتی کے جرم ناقابل ضمانت جرم ہوگا، فوری اور جلد سزا دلانے کے لیے سپیڈی ٹرائل کورٹس بنیں گی۔
پنجاب کے پراسیکیوشن محکمہ کی مکمل اوورہالنگ کا بھی فیصلہ کیا گیا
پولیس کو کرپشن اورجرائم پیشہ عناصر کے مددگاروں سے پاک کرنے، پولیس افسران اور اہلکاروں کی پیشہ وارانہ قابلیت اور کارکردگی کی جانچ کے لیے اسپیشل آڈٹ سسٹم نافذ کیے جانے کا فیصلہ کیا گیا۔
صوبے بھر میں معیاری پولیسنگ، پراسیکیوشن اورمقدمات کی رفتار تیز بنانے کے لیے جدید ٹیکنالوجی استعمال ہوگی، شہری جدید آئی ٹی ڈیش بورڈ کے ذریعے رشوت مانگنے والے کی شکایت کرسکیں گے، شکایت کرنے والے کی معلومات خفیہ رکھی جائیں گی۔
ہر جرم کے لیے الگ اسپیشل فورس بنانے کا فیصلہ
اجلاس میں پولیس میں کرپشن کے خاتمے، صوبے میں بجلی چوری، اسمگلنگ کے تدارک کے لیے کریک ڈاﺅن کی رفتار تیز کرنے کی ہدایت کی گئی۔ آرگنائزڈ اور سائبر کرائم کے خاتمے کے لیے اسپیشل یونٹ کے قیام اور آئی ٹی ٹریننگ کا اصولی فیصلہ کیا گیا۔
اسمگلنگ روکنے کے لیے نئی سرحدی فورس بنانے کی تجویز پر غور، منشیات کے خاتمے کے لیے مہم مسلسل جاری رکھنے کی منظوری دی گئی۔
پنجاب میں ناجائز اسلحہ کلچر کے خاتمے کے لیے سخت اقدامات کی ہدایت، نئے اسلحہ لائسنس کے اجرا پر پابندی لگا دی گئی۔
پنجاب میں ہرطرح کے مسلح گینگز کے خلاف آپریشن کلین اپ کا بھی فیصلہ
اجلاس میں پنجاب کے قبائلی علاقوں میں سماجی بہبود اور ترقی کا پیکج بھی تیار کرنے کی ہدایت کی گئی، پتنگ بازی اور دھاتی تار کے استعمال کے سدباب کے لیے مزید فول پروف انتظامات کرنے کی ہدایت کی گئی۔
مریم نواز شریف نے کہا کہ جامع اصلاحات، سخت اور فوری سزاوں سے جرائم میں کمی یقنی بنائی جاسکتی ہے، بچوں اور عورتوں سے زیادتی کے مجرموں کو عبرت کا نشان بنانا ہے۔
وزیر اعلیٰ مریم نواز نے کہا کہ ہر شہری کی عزت وآبرو، جان ومال کا تحفظ اور خدمت حکومت کی بنیادی ذمہ داری ہے، پولیس کو جدید اسلحہ، آلات، گاڑیاں، نائٹ ویژن اور ڈرون فراہم کریں گے۔
مریم نواز نے ہدایت کی کہ مصنوعی ذہانت (اے آئی ) اور تھرمل امیجنگ جیسی جدید ٹیکنالوجی استعمال کی جائے، پنجاب کو دہشت گردی، اسمگلنگ اورجرائم پیشہ گینگز سے پاک کیاجائے۔
انہوں نے کہا کہ پراسکیوشن اور انوسٹی گیشن نظام میں بہتری لائے بغیر جرم ختم نہیں ہوگا، اجلاس میں صوبے میں امن و امان کی صورتحال کا تفصیلی جائزہ لیا گیا۔
انسپکٹر جنرل پولیس پنجاب نے امن امان کی مجموعی صورت حال پر بریفنگ دی۔
سینئر منسٹر مریم اورنگزیب، چیف سیکرٹری، ہوم سیکرٹری، آئی جی، اے آئی جی، کمشنر، سی سی پی او، آر پی او سمیت اعلیٰ حکام اجلاس میں شریک ہوئے۔
