بھارتی اداکار سلمان خان کی رہائش گاہ کے سامنے فائرنگ کرنے والے ملزمان نے دورانِ تفتیش حیران کن انکشافات کر ڈالے۔
فائرنگ کے واقعے کے بعد ممبئی پولیس نے اگلے ہی روز دو ملزمان کو بھارتی ریاست گجرات کے علاقے بھوج سے گرفتار کرلیا اور دونوں کا تعلق بشنوئی گینگ سے ہونے کی تصدیق بھی کی تھی۔
ملزمان کو 16 اپریل سے 25 اپریل تک پولیس کی تحویل میں رکھنے کا فیصلہ سنایا گیا اور اب تفتیش کے دوران ملزمان کی جانب سے کیے گئے انکشافات سے متعلق بھی بتایا گیا ہے۔ ممبئی کرائم برانچ نے انکشاف کیا کہ’ شوٹرز کا مقصد سلمان خان کو قتل کرنا نہیں بلکہ صرف ان کو خوفزدہ کرنا تھا’۔
بھارتی میڈیا رپورٹس کے مطابق شوٹرز سے اس کام کے 4 لاکھ بھارتی روپے دینے کا وعدہ کیا گیا تھا جس کی پہلی پیمنٹ 1 لاکھ بھارتی روپے طے تھی۔
یاد رہے کہ 14 اپریل کو صبح 5 بجے دو نامعلوم موٹر سائیکل سواروں نے سلمان خان کی ممبئی کے علاقے بندرہ میں رہائش گاہ کے سامنے ہوائی فائرنگ کی اور پھر وہاں سے فرار ہوگئے۔ فائرنگ کے واقعہ کے بعد بشنوئی گینگ کی جانب سے فائرنگ کی ذمہ داری لارنس بشنوئی کے بھائی انمول بشنوئی نے مائیکرو بلاگنگ پلیٹ فارم فیس بُک پر ایک پوسٹ کے ذریعے خود قبول کرلی تھی۔
