خیبر پختونخوا بار کونسل کی ڈسپلنری کمیٹی نے سوشل میڈیا پر عدلیہ اور پشاور ہائیکورٹ بار ایسوسی ایشن کے خلاف منفی مواد شیئر کرنے کے معاملے پر پاکستان تحریک انصاف (پی ٹی آئی ) کے رہنماء مشال اعظم ایڈووکیٹ کو 20 اپریل کو طلب کرلیا ہے۔
مزید پڑھیں
خیبر پختونخوا بار کونسل کی ڈسپلنری کمیٹی کی جانب سے جاری نوٹس کے مطابق مشال اعظم ایڈووکیٹ وضاحت کے لیے 20 اپریل کو کمیٹی کے سامنے پیش ہوں۔
نوٹس میں ڈسپلنری کمیٹی نے بتایا ہے کہ مشال اعظم اور 2 دیگر وکلاء نے سوشل میڈیا پر عدلیہ اور پشاور ہائیکورٹ بار کے خلاف منفی مواد شیئر کیا تھا۔
ایک وکیل بار کونسل کے سامنے پیش ہوا اور تحریری معافی نامہ بھی جمع کیا تاہم مشال اعظم ایڈووکیٹ اور ان کا دوسرا ساتھی وکیل پیش نہیں ہوئے۔
بار کونسل نے یکم جنوری 2024 کو مشال اعظم کی وکالت کا لائنسنس منسوخ کیا تھا اور معاملہ ڈسپلنری کمیٹی کو ارسال کر دیا تھا۔
ڈسپلنری کمیٹی نے کارروائی شروع کردی ہے اور مشال اعظم کو نوٹس جاری کرکے 20 اپریل کو طلب کرلیا ہےے۔مشال اعظم کی وکالت کا لائسنس تاحال معطل ہے۔