نیویارک میں قائم کولمبیا یونیورسٹی میں فلسطینوں کی حمایت میں مظاہرہ کرنے پر 100 سے زیادہ طلبہ کو گرفتار کرلیا گیا۔
غیرملکی میڈیا رپورٹس کے مطابق کولمبیا یونیورسٹی کی سربراہ مینوش شفیق نے بتایا کہ گرفتار یونیورسٹی کے طلبہ 7 اکتوبر کو غزہ پر اسرائیلی فوجی کارروائیوں کے خلاف مہینوں سے احتجاج کررہے تھے، انہیں کئی بار انتباہ کیا گیا کہ وہ یونیورسٹی کے قواعد و ضوابط کی خلاف ورزی کررہے ہیں اور انہیں منتشر ہو جانا چاہیے۔
مزید پڑھیں
انہوں نے مزید بتایا کہ طلبہ کو یہ بھی بتایا گیا کہ احتجاجی کیمپ میں موجود تمام طلبہ کو مطلع کردیا گیا ہے کہ وہ معطل کیے جاچکے ہیں اور اس وقت کیمپ میں موجود طالب علموں کے پاس یونیورسٹی کے احاطے میں موجود رہنے کا اختیار نہیں رہا اور ان کی حیثیت ناجائز قابضین کی ہے۔
واضح رہے کہ نیویارک پولیس ڈیپارٹمنٹ کے اہلکار یونیورسٹی کیمپس پہنچے اور انہوں نے احتجاج میں شریک طلبہ کو گرفتار کرکے ہتھکڑیاں لگائیں اور پھر بسوں کے ذریعے انہیں پولیس اسٹیشن پہنچا دیا۔
گزشتہ 50 سال کے عرصے میں یہ کولمبیا یونیورسٹی کیمپس میں طالب علموں کی پہلی بڑی گرفتاری تھی۔