خیبرپختونخوا کے ضلع اپر دیر سے سوات جانے والے خاندان کے افراد شدید بارش اور طوفان کی زد میں آگئے جس کے باعث 2 بچیاں شدید سردی سے زندگی کی بازی ہار گئیں جبکہ دیگر افراد بے ہوش ہوگئے۔
ریسکیو حکام کے مطابق اپر دیر سے 10 افراد پر مشتمل خاندان پہاڑی راستے سے سوات جا رہا تھا۔ اور یہ لوگ نہاگ درہ کرپاٹ تحصیل واڑی سے تعلق رکھتے تھے۔ جو کٹوری چڑی خوڑ کے قریب شدید طوفان کی لپیٹ میں آگئے۔
مزید پڑھیں
ریسکیو حکام نے بتایا کہ پہاڑی علاقے میں شدید بارش اور طوفان کے باعث سردی کی شدت میں اضافہ ہوا ہے۔ شدید بارش اور سردی کے باعث 2 بچیاں جاں بحق ہو گئیں جبکہ کچھ افراد بے ہوش ہوئے۔ جنہیں ریسکیو اور مقامی افراد نے واپس اپر دیر منتقل کردیا۔
ریسکیو حکام نے بتایا کہ بیہوش ہونے والی ایک خاتون کی حالت بھی نازک ہے جس کا واڑی اسپتال میں علاج جاری ہے۔
دوسری جانب وزیراعلیٰ خیبر پختونخوا علی امین گنڈاپور نے اپر دیر سے سوات جاتے ہوئے شدید سردی سے 2 بچیوں کے جاں بحق ہونے پر افسوس کا اظہار کیا ہے۔
انہوں نے متاثرہ خاندان کو ریلیف فراہم کرنے کے لیے ہنگامی بنیادوں پر اقدامات کرنے کی ہدایت کی۔ جبکہ سردی کی وجہ سے بیہوش ہونے والے افراد کو فوری بہتر طبی امداد کی فراہمی کی بھی ہدایت کردی۔
واضح رہے کہ آج پی ڈی ایم اے نے خیبرپختونخوا میں بارشوں کے باعث ہونے والے نقصانات کی رپورٹ بھی جاری کی ہے جس کے مطابق مختلف حادثات میں 59 افراد جاں بحق جبکہ 72 افراد زخمی ہوئے۔
