خیبرپختونخوا میں حالیہ بارشوں کے باعث ہونے والے نقصانات کی تفصیلات سامنے آگئی ہیں جس کے مطابق مختلف حادثات میں 59 افراد جاں بحق جبکہ 72 افراد زخمی ہوئے۔
پاکستان ڈیزاسٹر مینجمنٹ اتھارٹی (پی ڈی ایم اے) نے بتایا ہے کہ جاں بحق افراد میں 33 بچے، 14 مرد اور 12 خواتین شامل ہیں جبکہ زخمیوں میں 14 خواتین، 35 مرد اور 23 بچے شامل ہیں۔
مزید پڑھیں
رپورٹ کے مطابق مختلف اضلاع میں دیواریں اور چھتیں گرنے سے مجموعی طور 2883 مکانات کو نقصان پہنچا جس میں 436 گھروں کو مکمل جبکہ 2447 گھروں کو جزوی نقصان پہنچا۔
پی ڈی ایم اے نے بتایا کہ تیز بارشوں کے باعث جانی و مالی حادثات صوبہ کے مختلف اضلاع خیبر، دیر اپر و لوئر، چترال اپر و لوئر، سوات، باجوڑ، شانگلہ، مانسہرہ، مہمند، مالاکنڈ، کرک، ٹانک، مردان، پشاور، چارسدہ، نوشہرہ، بونیر، ہنگو، بٹگرام، بنوں، شمالی و جنوبی وزیرستان، کوہاٹ، ڈی آئی خان اورکزئی میں رونما ہوئے۔
پی ڈی ایم اے کے مطابق وزیراعلیٰ خیبرپختونخوا کی خصوصی ہدایت پر پی ڈی ایم نے حالیہ بارشوں میں متاثرہ اضلاع کی انتظامیہ کو جاں بحق ہونے والے افراد کے لواحقین کی مالی امداد اور امدادی سرگرمیوں کے لیے 110 ملین روپے جاری کیے ہیں۔ اس کے علاوہ قبائلی اضلاع میں بھی امدادی سرگرمیوں کی مد میں 90 ملین روپے جاری کیے جا چکے ہیں۔
متاثرہ اضلاع میں امدادی سامان فراہم کردیا گیا
ترجمان نے بتایا کہ مالی معاونت کے ساتھ ساتھ پی ڈی ایم اے کی جانب سے متاثرہ اضلاع سوات، چترال لوئر، باجوڑ، کوہستان لوئر، پشاور، نوشہرہ، مہمند، دیر اپر، ٹانک، شانگلہ، تورغر اور ڈی آئی خان کو امدادی سامان بھی فراہم کردیا گیا۔
پی ڈی ایم اے نے بتایا کہ امدادی سامان میں خیمے، چٹائیاں، کچن سیٹس، کمبل، بستر، ترپال، سولر لیمپس اور دیگر روزمرہ زندگی کی اشیا شامل ہیں۔
رپورٹ کے مطابق پی ڈی ایم اے اور تمام متعلقہ اداروں کی جانب سے بارشوں سے متاثرہ اضلاع میں امدادی سرگرمیاں جاری ہیں۔
بارشوں کا سلسلہ 21 اپریل تک جاری رہنے کا امکان
پی ڈی ایم اے نے بتایا کہ بارشوں کا سلسلہ 21 اپریل تک وقفے وقفے سے جاری رہنے کا امکان ہے۔
بتایا گیا ہے کہ پی ڈی ایم اے کا ایمرجنسی آپریشن سینٹر مکمل طور پر فعال ہے، عوام کسی بھی نا خوشگوار واقعے کی اطلاع 1700 پر دیں۔
