پاکستانیوں کے لیے اچھی خبر، تیل اور گیس کے نئے ذخائر دریافت

ماری پیٹرولیم کمپنی لمیٹڈ (MPCL) نے ماری فیلڈ کے کنویں شوال-1 سے تیل کے اہم ذخائر دریافت کیے ہیں۔ پیداواری آزمائش کے دوران کنویں سے یومیہ 1 ہزار 40 بیرل تیل اور 2 اعشاریہ 5 لین مکعب فٹ گیس کی پیداوار کا تخمینہ ہے۔

ترجمان ماری پیٹرولیم کمپنی لمیٹڈ کے مطابق سندھ میں واقع ماری ڈویلپمنٹ اینڈ پروڈکشن لیز میں کھودے جانے والے کنویں شوال-1 سے تیل اور گیس کے ذخائر دریافت کیے گئے ہیں۔ شوال-1 پر 27 جنوری 2024 سے کام شروع کیا گیا تھا اور اسے غازی فارمیشن میں 1 ہزار 136 میٹر کی گہرائی تک کامیابی سے کھودا گیا۔

پیداواری آزمائش کے دوران کنویں سے یومیہ 1 ہزار 40 بیرل تیل اور 2 اعشاریہ 5 لین مکعب فٹ گیس کی پیداوار کا تخمینہ ہے۔ ماری پیٹرولیم کمپنی لمیٹڈ کے ایم ڈی فہیم حیدر نے اسے سائنسدانوں اور انجینئرز کے لیے کامیابی قرار دیتے ہوئے کہا کہ دریافت کی کوششوں اور نئی ٹیکنالوجیز کے استعمال سے یہ سنگ میل عبور کیا گیا ہے۔

ان کا کہنا تھا کہ کمپنی اب اس دریافت کا اندازہ لگانے کا ارادہ رکھتی ہے تاکہ اس کی حد کو ثابت کیا جاسکے اور اس کے ترقیاتی اختیارات کا جائزہ لیا جا سکے۔ پیٹرولیم ڈویژن نے بھی انتظامیہ کو مبارکباد دیتے ہوئے پیٹرولیم کی تلاش اور پیداواری سرگرمیوں میں ایم پی سی ایل کے عزم اور پیشہ ورانہ مہارت کو سراہا۔

ترجمان کا کہنا ہے کہ ایم پی سی ایل کا مقصد ملک میں ہائیڈرو کاربن کی گرتی ہوئی پیداوار کو روکنے کے لیے موجودہ شعبوں سے زیادہ سے زیادہ پیداوار اور تیز رفتار ریسرچ پروگرام کے ذریعے نئے وسائل کی دریافت میں اپنا حصہ ڈالنا ہے۔