پشاور میں خاوند نے گھریلو ناچاقی پر مبینہ طور پر فائرنگ کرکے ناراض بیوی سمیت تین افراد کو قتل کر دیا۔ فائرنگ کے اس واقعہ میں دو افراد زخمی بھی ہو ئے ہیں۔
تھانہ شاہ پور کی حدود میں پخہ غلام کے علاقہ میں پیش آئے اس جان لیوا فائرنگ کے واقعہ کی ایف آئی آر درج کرلی گئی ہے۔
ابتدائی پولیس رپورٹ کے مطابق رات گئے ملزم حکیم خان دیگر ساتھیوں سمیت گھر میں داخل ہوئے اور اندھا دھند فائرنگ کر دی۔ جس کے نتیجہ میں ملزم کی بیوی، سالی اور گھر میں موجود بچہ مواقع پر ہی ہلاک ہوگئے۔
فائرنگ سے ملزم کی ساس سمیت دو افراد زخمی بھی ہوئے ہیں۔ زخمیوں اور لاشوں کو لیڈی ریڈنگ اسپتال منتقل کر دیا گیا ہے۔
پولیس کے مطابق فائرنگ کے بعد مرکزی ملزم ساتھیوں سمیت فرار ہونے میں کامیاب ہوگیا تھا۔
ایف آئی آر کے مطابق مقتولین کے لواحقین نے پولیس کو بتایا کہ ملزم شوہر سے ناراضی کے باعث مقتولہ کچھ عرصے سے میکے میں مقیم تھی۔ جس سے ملزم خوش نہیں تھا۔
پولیس نے ملزم کے خلاف مقدمہ درج کر لیا ہے تاہم ابھی تک کوئی گرفتاری عمل میں نہیں آئی ہے۔
