اسلام آباد میں انوکھا واقعہ پیش آیا ہے۔ خاوند نے بیوی کو ٹک ٹاک کے لیے ڈانس ویڈیو بنانے سے منع کیا تو اس نے اپنے بھائیوں اور دیگر گھر والوں سے مل کر شوہر کو تشدد کا نشانہ بنا ڈالا۔ زخمی خاوند شکایت لے کر تھانہ پہنچ گیا۔
سبزی منڈی پولیس سٹیشن میں درج ایف آئی آر میں خاوند نے مؤقف اپنایا کہ وہ مورخہ 10 اپریل کو موٹر سائیکل پر اپنی بیوی کو گھمانے پھرانے شکر پڑیاں لے گیا۔ وہاں پہنچ کر بیوی نے سائیڈ پر موٹرسائیکل رکوائی اور اپنے سر سے دوپٹہ اتار کر، بال کھول کر خاوند کو کہا کہ ویڈیو بنائے، اُس نے ٹک ٹاک پر لگانی ہے۔
ایف آئی آر کے مطابق خاوند نے اسے منع کیا کہ، “ہم دین دار لوگ ہیں، ہمیں اسلام اس چیز کی اجازت نہیں دیتا اور میں ایک غیرت مند مرد ہوں۔” اس بات پر بیوی نے جھگڑا شروع کر دیا۔ بڑی مشکل سے خاوند نے موٹرسائیکل پر بٹھایا لیکن بیوی نے چلتے موٹر سائیکل سے چھلانگ مارنے کی کوشش کی اور “گھر آنے تک اس نے راستے میں تماشا بنایا۔۔۔ کہ آپ نے میری ویڈیو ڈانس کرنے کی نہیں بنائی”۔
خاوند نے پولیس کو بتایا کہ اگلی صبح بیوی نے اپنے والدین کے گھر فون کیا جہاں سے دن ایک بجے 6 لوگ آ کر حملہ آور ہو گئے۔ انہوں نے خاوند کے گھر کا گیٹ زور سے مارا اور گھر میں داخل ہو گئے اور خاوند کے علاوہ اس کے بھائی اور والدہ کو بھی مارا اور انہیں قتل کرنے کی دھمکیاں بھی دیں۔
خاوند نے 15 پر کال کر کہ پولیس کی مدد لی اور اپنے سسر سمیت 3 خواتین پر ایف آئی آر درج کرا لی۔