پی ٹی آئی کے ساتھ کوئی ڈیل ہورہی ہے نہ ڈھیل ملے گی، فیصل واوڈا

سینیئر سیاستدان سینیٹر فیصل واوڈا نے کہا ہے کہ پی ٹی آئی کے ساتھ کوئی ڈیل ہورہی ہے نہ ڈھیل ملے گی، آنے والے دنوں میں سب سامنے آجائے گا۔

نجی ٹی وی کے پروگرام میں گفتگو کرتے ہوئے انہوں نے کہاکہ عمران خان کے ساتھ گیم ہورہی ہے اور وہ تباہ و برباد ہونے جارہے ہیں۔

فیصل واوڈا نے کہاکہ پی ٹی آئی کی قیادت چاہتی ہے کہ عمران خان ابھی مزید جیل میں رہیں اور وہ مزے لوٹتی رہے۔

انہوں نے کہاکہ پاکستان تحریک انصاف جماعت کے بانی عمران خان کی مقبولیت کا فائدہ اٹھانا چاہتی ہے۔

انہوں نے کہاکہ وزیراعلیٰ خیبرپختونخوا علی امین گنڈاپور دائیں بائیں بھی ہیں اور حکومت کے ساتھ بھی ہیں۔

ایک سوال کے جواب میں انہوں نے کہاکہ اگر کوئی دیکھ لے کہ کھانے میں زہر ڈالا گیا ہے تو کیا وہ کھائے گا۔

واضح رہے کہ پاکستان تحریک انصاف یہ دعویٰ کررہی ہے کہ عمران خان جلد جیل سے رہا ہو جائیں گے، آج پی ٹی آئی نے سابق وزیراعظم کی رہائی کے لیے ملک کے مختلف علاقوں میں ریلیاں بھی نکالیں۔

دوسری جانب پی ٹی آئی کے سینیئر رہنما شہریار آفریدی نے کہاکہ ہم آرمی چیف اور ڈی جی آئی ایس آئی سے مذاکرات کرنا چاہتے ہیں جو جلد ہوں گے۔