وفاقی وزیر برائے صنعت و پیداوار رانا تنویر حسین نے فرٹیلائزر کمپنی کا یوریا کی فی بوری پر 561 روپے اضافہ کا نوٹس لیتے ہوئے کہا کہ فرٹیلائزر انڈسٹری کے لیے گیس کی قیمتوں میں کسی قسم کا اضافہ نہیں ہوا۔ گیس کی قیمتوں میں اضافے کے بغیر اضافہ ناقابل قبول اور بلا جواز ہے۔
مزید پڑھیں
ترجمان وزارت صنعت و پیداوار کے مطابق رانا تنویر حسین نے یکطرفہ اضافہ فوری واپس لینے کی ہدایت کرتے ہوئے کہا ہے کہ کھاد کمپنیاں اضافے کا ٹھوس جواز فراہم کریں وگرنہ ناکامی پر سخت اقدامات لیے جائیں گے۔
رانا تنویر حسین نے مزید کہا کہ اچانک یکطرفہ اضافے سے کسانوں کے لیے مشکلات میں اضافہ ہوا۔ یوریا کھاد پر ناجائز منافع کی اجازت نہیں دی جائے گی۔ وفاقی وزیر نے کہا کہ یوریا کھاد کی فراہمی میں خلل قابل قبول نہیں ہے۔ کھاد کی ذخیرہ اندوزی کے خاتمے کے لیے صوبوں کے ساتھ مل کر کام کر رہے ہیں۔
