پاسپورٹ آفس کی دیواریں بھی پیسے مانگتی ہیں، شہری وزیر داخلہ کے سامنے پھٹ پڑے

وفاقی وزیرداخلہ محسن نقوی نے لاہور میں واقعہ پاسپورٹ آفس گارڈن ٹاؤن کا دورہ کیا جہاں پر موجودہ شہریوں نے ان سے افسران کی جانب سے رشوت لینے سمیت دیگر شکایات کیں۔

محسن نقوی پاسپورٹ آفس کے حالات دیکھ کر شدید برہم ہوئے اور فوری طور پر ڈائریکٹر اور اسسٹنٹ ڈائریکٹر کی تبدیلی کے ساتھ ان کے خلاف انکوائری کا بھی حکم دیدیا۔

وزیر داخلہ کو شہریوں نے پاسپورٹ بنوانے کے لیے ایجنٹ مافیا کو رقم دینے کے ثبوت بھی دکھائے۔ اس موقع پر ڈائریکٹر اور اسسٹنٹ ڈائریکٹر کسی بھی سوال کا تسلی بخش جواب نہ دے سکے۔

شہریوں نے شکایت کرتے ہوئے کہاکہ یہاں پاسپورٹ آفس کی دیواریں بھی پیسے مانگتی ہیں، گارڈ سے لے کر ہر کوئی اپنا حصہ مانگتا ہے اور اگر پیسے دے دیں تو پاسپورٹ کو پہیے لگ جاتے ہیں۔

محسن نقوی نے برہمی کا اظہار کرتے ہوئے کہاکہ عملے کی ملی بھگت کے بغیر پیسے لینے کا سوال ہی پیدا نہیں ہوتا۔ شہریوں کو سہولت دینا ہماری ذمہ داری ہے۔

اس موقع پر شہریوں نے محسن نقوی سے گفتگو کرتے ہوئے کہاکہ آپ نے وزارت اعلیٰ کے دور میں مثالی کام کیا۔ اب بھی آپ ہی اس دفتر کو ٹھیک کرسکتے ہیں۔