نائب وزیر اعظم اور وزیر خارجہ محمد اسحاق ڈار اور گیمبیا کے وزیر خارجہ ڈاکٹر مامادو تنگارا نے 2 طرفہ سیاسی مشاورت سے متعلق مفاہمت کی یادداشت پر دستخط کردیے۔
مزید پڑھیں
اسحاق ڈار نے بنجول، گیمبیا میں 15 ویں او آئی سی اسلامی سربراہی اجلاس کے موقعے پر جمہوریہ گیمبیا کے وزیر خارجہ، بین الاقوامی تعاون اور گیمبیئنز کے بیرون ملک رہنے والے وزیر ڈاکٹر مامادو تنگارا سے ملاقات کی۔
نائب وزیراعظم نے دونوں ممالک کے درمیان مذہبی وابستگی، باہمی اعتماد اور مشترکہ اقدار پر مبنی گہرے تعلقات کو سراہا اور گیمبیا کی حکومت کو 15ویں او آئی سی اسلامی سربراہی اجلاس کے کامیاب انعقاد پر مبارکباد دی۔
دونوں رہنماؤں کے درمیان پاکستان اور گیمبیا کے تعلقات کے تمام پہلوؤں پر تبادلہ خیال کیا گیا اور تجارت، زراعت، تعلیم اور سیاحت جیسے مختلف شعبوں میں اعلیٰ سطح کے مذاکرات اور تعاون کو مزید بڑھانے پر اتفاق ہوا۔
مزید برآں دونوں رہنماؤں نے اقوام متحدہ اور او آئی سی سمیت کثیرالجہتی فورمز میں دوطرفہ تعاون پر بھی تبادلہ خیال کیا۔
اس موقعے پر گفتگو کرتے ہوئے اسحاق ڈار نے کہا کہ پاکستان اور گیمبیا کے درمیان خوشگوار تعلقات ہیں اور دونوں ممالک دوطرفہ سیاسی اور اقتصادی امور اور کثیرالجہتی فورم پر بھی تعاون جاری رکھیں گے۔
