مریم نواز شریف کی اولین ترجیح صحت مند پنجاب ہے، عظمیٰ بخاری

وزیر اطلاعات پنجاب عظمیٰ بخاری نے کہا ہے کہ وزیراعلیٰ پنجاب مریم نواز شریف کی اولین ترجیح صحت مند پنجاب ہے، وزیراعلیٰ پنجاب کام کرنے اور عمل کرنے پر یقین رکھتی ہیں۔

وزیر اطلاعات پنجاب نے اپنے بیان میں کہا ہے کہ وزیراعلیٰ پنجاب مریم نواز شریف کے ویژن کے مطابق پنجاب بھر میں فیلڈ اسپتالوں نے کام شروع کر دیا ہے۔ گزشتہ روز فیلڈ اسپتالوں نے ایک دن میں ایک ہزار سے زائد مریضوں کا معائنہ کیا۔ فیلڈ اسپتال میں موجود ٹیسٹنگ لیبارٹری سے 85 مریضوں نے ٹیسٹ کی سہولیات سے استفادہ کیا۔

عظمیٰ بخاری نے کہا کہ 72 مریضوں نے الٹراساؤنڈ اور ایکسرے ٹیسٹ بھی کروائے۔ فیلڈ اسپتال پنجاب کے پسماندہ علاقوں میں عوام کو مسلسل سہولیات فراہم کر رہے ہیں۔ فیلڈ اسپتال بہاولپور، جھنگ، اوکاڑہ، ملتان، مظفرگڑھ، فیصل آباد اور سرگودھا کے دور دراز علاقوں میں مکمل طور پر فنکشنل ہو گئے ہیں۔