وزیراعلیٰ پنجاب مریم نواز شریف نے پنجاب بھر کے لیے ’فری میڈیسن ڈیلیوری پراجیکٹ‘ کا افتتاح کردیا، وہ ادویات لے کر خود مریضوں کے گھر پہنچ گئیں۔
مریم نواز نے مختلف علاقوں میں لوگوں کے گھروں میں جاکر مریضوں کو ادویات فراہم کیں جس پر انہوں نے خوشی کا اظہار کیا اور کہا کہ اب ہمیں اسپتالوں میں دھکے نہیں کھانے پڑیں گے۔
اس کے علاوہ وزیراعلیٰ مریم نواز شریف نے پرائمری اینڈ سیکنڈری ہیلتھ کیئر ڈیپارٹمنٹ میں سہولت مرکز کا بھی افتتاح کیا، انہوں نے ٹی بی اور ہیپاٹائٹس کے مریضوں کی رجسٹریشن کے عمل کا دوبارہ باقاعدہ آغاز کیا۔
مزید پڑھیں
مریم نواز نے ادویات کا معیار چیک کرنے کے لیے قائم ڈرگ ٹیسٹنگ لیب کا بھی معائنہ کیا، انہوں نے کرومیٹو گرافی، ڈرگ ریلیز لیب اور ڈرگ سیمپل ریسونگ ایریا کا بھی دورہ کیا۔
لاہور میں تقریب سے خطاب کرتے ہوئے وزیراعلیٰ پنجاب مریم نواز نے کہاکہ 2 لاکھ مریضوں کو فری ادویات ان کی دہلیز پر دی جائیں گی۔ میں خود بھی چند گھروں میں ادویات لے کر جاؤں گی، 2 ماہ کا اسٹاک گھر پر ڈیلیور کیا جائے گا اور 2 ماہ بعد مریضوں کا دوبارہ معائنہ ہوگا اور اگر دوائیاں دوبارہ شروع کرنا ہوں گی تو پھر اس کا اسٹاک لوگوں تک پہنچایا جائے گا۔
انہوں نے کہاکہ گھر پر ادویات ڈیلیور کرنے کا پراجیکٹ نواز اور شہباز شریف نے شروع کیا تھا، اس میں ہیپاٹائٹس، دل کے امراض اور ٹی بی کے مریضوں کو ادویات گھروں پر ڈیلیور کی جاتی تھیں مگر افسوس کہ پچھلے ادوار میں اس سہولت کو بڑھانے کے بجائے اس منصوبے کو ہی ختم کردیا گیا، لوگ مفت ادوایات سے محروم ہوگئے، گھر پر ڈیلیوری خواب و خیال بن گئی تھی، تاہم ہم نے اس کو ری لانچ کیا اور اس کا دائرہ کار پورے پنجاب تک بڑھا دیا ہے۔
مریم نواز نے کہاکہ میں نواز اور شہباز شریف کی رہنمائی میں چلنے کی کوشش کر رہی ہوں، نوازشریف کی بیٹی اور شہبازشریف کی بھتیجی ہونے پر فخر ہے۔ میں پورے ہیلتھ ڈیپارٹمنٹ کو شاباش دیتی ہوں اور امید کرتی ہوں کہ 5 سال کے بعد ہم جب پنجاب چھوڑ کر جائیں گے تو یہاں کوئی بھی علاج کی سہولت سے محروم نہیں رہے گا، ہم نے 32 فیلڈ اسپتالوں کو بھی میدان میں اتار دیا ہے، یہ منی اسپتال ہیں۔ نیت خدمت کی ہو تو کنیٹنر کا اس طرح بھی استعمال ہوسکتا ہے۔
وزیراعلیٰ پنجاب نے کہا کہ ہم آنے والے دنوں میں 200 کے قریب کلینکس آن وہیلز لانچ کریں گے۔ ہم لاہور میں پہلا اسٹیٹ آف دی آرٹ کینسر اسپتال بنا رہے ہیں، پنجاب کے ہر ضلع میں سٹیٹ آف دی آرٹ ہسپتال ہوگا۔ ایک سال کے اندر اس کا آؤٹ دور شروع کر دینا چاہیے، مسلم لیگ (ن) کی حکومت اچھے منصوبے لاتی ہے لیکن اس کے بعد فتنے لے آتے ہیں یہاں پر، ملک آگے جانے کے بجائے کئی دہائی پیچھے چلا جاتا ہے۔
مریم نواز کا کہنا تھا کہ اس قوم کے ساتھ زیادتی اور ظلم ہوتا ہے جب مسلم لیگ (ن) کی سیاست ختم کی جاتی ہے، کوئی بھی وزارت اٹھا کر دیکھ لیں، وہاں کے جو حالات ہیں ہمیں وہاں دوبارہ سے کام شروع کرنا پڑے گا۔ ہم پنجاب میں ایئر ایمبولینس شروع کرنے جارہے ہیں اس کے ذریعے ہم بہت سی قیمتی جانوں کو بچا سکیں گے۔
