وزیر خارجہ اسحاق ڈار کی چین کی نیشنل پیپلز کانگریس کی قائمہ کمیٹی کے وائس چیئرمین زینگ جیان بینگ سے ملاقات۔ وزیر خارجہ نے چین کے بنیادی ترجیہات پر پاکستان کی مضبوط حمایت کا اعادہ کیا۔ اسحاق ڈار نے اقتصادی تعاون کے ذریعے باہمی پیداواری تعلقات کو بڑھانے کی اہمیت پر زور دیا۔ ترکیہ کے وزیر خارجہ نے بھی وزیر خارجہ سینیٹر اسحاق ڈار سے ملاقات کی ہے۔
مزید پڑھیں
نائب وزیر اعظم و وزیر خارجہ اسحاق ڈار کی گیمبیا میں او آئی سی سمٹ کے موقع پر سائیڈ لائن ملاقاتوں کا سلسلہ جاری ہے۔ ترجمان دفتر خارجہ کا کہنا ہے کہ وزیر خارجہ اسحاق ڈار نے چین کی نیشنل پیپلز کانگریس کی قائمہ کمیٹی کے وائس چیئرمین زینگ جیان بینگ سے ملاقات کی۔ اسحاق ڈار نے اقتصادی تعاون کے ذریعے باہمی پیداواری تعلقات کو بڑھانے کی اہمیت پر زور دیا۔ وائس چیئرمین کی جانب سے بھی پاکستان کی خود مختاری، علاقائی سالمیت اور ترقی کے لیے چین کی حمایت کا اعادہ کیا گیا۔
ترجمان کا کہنا ہے کہ فریقین نے پاکستان اور چین کے درمیان آل ویدر اسٹریٹجک کوآپریٹو پارٹنرشپ کی توثیق کی۔ اس کے علاوہ پاکستان کی پارلیمان اور چین کی نیشنل پیپلز کانگریس کے درمیان گہرے تبادلوں پر تبادلہ خیال کیا گیا۔ دونوں رہنماؤں نے سی پیک کے تمام منصوبوں کو مکمل کرنے اور مشترکہ مقاصد کے حصول کے لیے اس تعاون کو مزید اپ گریڈ کرنے کے عزم کا اظہار کیا۔
وزیر خارجہ سینیٹر اسحاق ڈار سے ترکیہ کے ہم منصب ہاکان فیدان نے بھی ملاقات کی۔ دونوں رہنماؤں نے دوطرفہ تعلقات کی صورتحال کا جائزہ لیا۔ ترجمان دفتر خارجہ کا کہنا ہے کہ ملاقات میں پاکستان اور ترکیہ کے دوطرفہ تعلقات اور دوستی کے مضبوط بندھن پر زور دیا گیا۔
