بزنس کی تھوڑی بہت سمجھ بوجھ دھوکے اور دھکے کھانے کے بعد آئی، کوہلی

انڈین کرکٹر ویرات کوہلی نے زندگی میں ملنے والے دھوکوں اور دھکوں پر لب کشائی کردی۔

35 سالہ بھارتی کرکٹر ویرات کوہلی فٹنس اور کرکٹ میں اپنی زبرست پرفارمنس کے لیے دنیا بھر میں مقبول تو ہیں ہی مگر ویرات کی شخصیت کا تفریحی پہلو بھی ان کے مداحوں کو ہمیشہ بھاتا ہے۔

حال ہی میں ایک تقریب کے دوران، صحافی نے ویرات کوہلی سے ان کے متبادل کیریئر کے بارے میں سوال پوچھتے ہوئے کہا اگر کوہلی کرکٹر نہ ہوتے تو کیا ہوتے؟

صحافی کے اس سوال کا جواب دیتے ہوئے پہلے تو انہوں نے لاعلمی کا اظہار کیا لیکن پھر اپنی بات جاری رکھتے ہوئے کامیاب بزنس مین بننے کا اشارہ دیا۔

انہوں نے کہا کہ ’سچ کہوں تو میں نے اس بارے میں کبھی نہیں سوچا کیونکہ مجھے بزنس چلانا بالکل بھی نہیں آتا تھا لیکن اب تھوڑا بہت آتا ہے۔ میں اگر کرکٹ کھیلے بنا بزنس کرتا تو 200 فیصد یقین کے ساتھ کہہ سکتا ہوں کہ لوگ مجھے بیوقوف بنالیتے۔‘

ویرات کوہلی نے اعتراف کیا کہ انہیں بزنس کی تھوڑی بہت سمجھ بوجھ دھوکے اور دھکے کھانے کے بعد آئی ہے۔

واضح رہے کہ ویرات کوہلی کا شمار اب بھارت کی کامیاب کاروباری شخصیات کی فہرست میں ہوتا ہے۔